ქართველი დიზაინერის შემოქმედებითი ცხოვრება ამერიკის შეერთებულ შტატებში

ქართველი დიზაინერი მარი ფერეტი აშშ-ში საცხოვრებლად 2011 წელს ჩავიდა და ნიუ იორკში აგრძელებს კარიერას. დაბრკოლებების მიუხედავად, ახალგაზრდა ემიგრანტმა საყვარელი საქმე არ მიატოვა, Mari Ferretti Swimwear ბრენდი შექმნა და დღეს უკვე ინტერნეტ მაღაზიის მფლობელია. ასევე, კერძო დამკვეთებს უქმნის სამოსს და მაღაზია „რიჩარდსის“ სამკერვალო განყოფილების მენეჯერად მუშაობს.
ქართველი დიზაინერის შემოქმედებითი ცხოვრება ამერიკის შეერთებულ შტატებში



მარი, როგორ და რატომ შეაჩერეთ არჩევანი საცხოვრებლად აშშ-ზე?

აშშ-ში 2011 წლის სექტემბერში ჩამოვედი და თითქმის თორმეტი წელია, რაც კონექტიკუტის შტატის ქალაქ სტემფორდში ვცხოვრობ. მართალი გითხრათ, აქ ჩამოსვლასა და ცხოვრებაზე არასოდეს მიფიქრია. საკმაოდ მოულოდნელად მოხდა. ლატარიაში მივიღე მონაწილეობა და მწვანე ბარათი მოვიგე. საქართველოს დატოვება ძალიან არ მინდოდა, მაგრამ ნამდვილად დანაშაული იქნებოდა, ეს შანსი არ გამომეყენებინა. თვალცრემლიანმა დავტოვე ქვეყანა იმ იმედით, რომ როგორც კი საბუთები მექნებოდა, უკან დავბრუნდებოდი.


ყველა ემიგრანტს სხვადასხვა გამოცდილება აქვს. როგორი იყო თქვენი პირველი ნაბიჯები უცხო მიწაზე?

ძალიან ბევრი რამის გადაფასება და ელემენტარული რამის სწავლა მომიწია. ეს რა თქმა უნდა, უცებ არ მოხდა და პროცესი დღესაც გრძელდება, მაგრამ ახალი ჩამოსულისთვის კულტურული განსხვავებულობა თვალშისაცემი და შესაგუებლად რთულია. საქართველოდან ინგლისურის ცოდნის მაღალი დონით ჩამოვედი, თუმცა ის მომენტიც მახსოვს, როდესაც რადიო ჩავრთე და ვერაფერი გავიგე. ეს იყო ერთ-ერთი პირველი რეალობა, რომელსაც შევეჯახე. ამერიკული აქცენტისთვის ყური რომ შემეჩვია, ინგლისური ენის შემსწავლელი კურსი გავიარე. შემდეგ სწავლა კოლეჯში გავაგრძელე და 2016 წელს დიპლომი ავიღე ბიზნესის ადმინისტრირებაში. მერე კი მოდის ინდუსტრიაში გადავინაცვლე.


როგორც ვიცი, საქართველოშიც ამ სფეროში იყავით დასაქმებული.

დიახ. 2003 წელს სამმა მეგობარმა მოდის სახლი „ნეო-სტილი“ გავხსენით, სადაც თავად ვქმნიდით ყველაფერს, დაწყებული დიზაინის სკეჩიდან, დამთავრებული აქსესუარებით. ძირითადად, შოუ ბიზნესის წარმომადგენლებისთვის ვმუშაობდით. სანამ საქართველოს დავტოვებდი, მოდას არასოდეს ჩამოვშორებულვარ. მუდამ მყავდა დამკვეთები, რომლებსაც ჩემი სტილი მოწონდათ. პარალელურად, არაფორმალური განათლების ტრენერად ვითავსებდი მუშაობას სხვადასხვა კომპანიებში.


როგორ მოახერხეთ მოდის სამყაროში დაბრუნება?

ყველა საძიებო ვებგვერდზე დავრეგისტრირდი და ჩემთვის საინტერესო პოზიციები მივუთითე დიზაინის სფეროში. სამწუხაროდ, ყველა კომპანია ოფიციალურად მიღებული ცოდნის დამადასტურებელ დიპლომს ითხოვდა, რაც იმ დროს არ მქონდა. რასაც მთავაზობდნენ, მკერავის პოზიცია იყო. ხელსაქმე დედისგან ვისწავლე და კარგად ვიცი. გადავწყვიტე, მკერავად დამეწყო მუშაობა მამაკაცების ტანსაცმლის მაღაზიაში. ერთი წლის მერე „ნორდსტრომიდან“ მქონდა შემოთავაზება, შემდეგ კი „რიჩარდსიდან“ (The Mitchells Family of Stores), რომელთანაც უკვე თერთმეტი წელია ვთანამშრომლობ. ამ მაღაზიების ქსელი მსოფლიოში საუკეთესო დიზაინერების სამოსს, ფეხსაცმელს, სამკაულებსა და აქსესუარებს ყიდის. ორი წლის შემდეგ დამაწინაურეს და დღეს სამკერვალო განყოფილების მენეჯერი ვარ. მიუხედავად იმისა, გამიმართლა და ძალიან კარგ კომპანიში ვმუშაობ, ეს სამსახური ჩემს შემოქმედებით ბუნებას არასოდეს აკმაყოფილებდა და პარალელურად, კერძო დამკვეთების მოზიდვაზე დავიწყე ფიქრი. მიხარია, რომ ჩემი სურვილი ახდა.


უკვე დიზაინერის დიპლომიც გაქვთ...

დიახ. ბიზნეს ადმინისტრირების დამთავრების შემდეგ, გადავწყვიტე ტანსაცმლის დიზაინერის დიპლომის აღებაზეც მეზრუნა და 2017 წელს ნიუ იორკის მოდის ტექნოლოგიის ინსტიტუტში ორი პროფესიის დაუფლება მოვასწარი.


დიპლომის გარდა, კიდევ რა მოთხოვნებს უნდა აკმაყოფილებდე, რომ აშშ-ში ტანსაცმლის დიზაინერად დაიწყო მუშაობა?

ხშირ შემთხვევაში, სამუშაო გამოცდილებას ითხოვენ. ასევე, კომპანიები სტაჟიორებს მოდის სკოლებიდან იწვევენ და შემდეგ განსაკუთრებულად ნიჭიერებს იტოვებენ.


რამდენად დიდია კონკურენცია ისეთ მეგაპოლისში, როგორც ნიუ იორკია და რა სირთულეების გადალახვა უწევთ ახალბედა დიზაინერებს?

ნიუ იორკი უდავოდ არის მოდის ერთ-ერთი მეგაპოლისი. შესაბამისად, ამ ქალაქში საოცრად დიდი კონკურენციაა ახალბედა დიზაინერების რიგებში. მხოლოდ მცირე ნაწილი საქმდება დიზაინის სახლებში, დანარჩენებს საკუთარი ძალებით უწევთ თავის წარმოჩენა. კოლექციის ან თუნდაც ერთი დამკვეთისთვის ხარისხიანი სამოსის შექმნა დიდ თანხებს უკავშრდება. ქსოვილის, მასალების მოძიება პირველი და დიდი ეტაპია, მერე მოდელის, დიზაინის განვითარება იწყება, რომელიც შეიძლება უსასრულოდ გაგრძელდეს თუ კარგი მწარმოებელი ვერ მოძებნე. როდესაც დიზაინი უკვე მორგებული და დახვეწილია, იწყება პროცესი მასიური პროდუქციის შესაქმნელად, რომელშიც სხვა პროფესიონალები ერთვებიან. შესაქმნელია თარგები სხვადასხვა ზომისთვის, მერე ქსოვილზე სწორად უნდა განაწილდეს, შემდეგი ეტაპები ქსოვილის დაჭრა და კერვაა. ეს ყველაფერი იმიტომ ჩამოვთვალე, რომ უამრავი წინაღობა ხვდებათ დიზაინერებს, როცა კარგად არ არიან გათვითცნობიერებული თითოეულ წვრილმანში. ნებისმიერ ეტაპზე შეიძლება მოხდეს გამოუსწორებელი შეცდომა. მაგალითად, თუ დიზაინერმა თარგის შექმნა არ იცის ან კერვა ან ქსოვილის სტრუქტურას ცუდად იცნობს, მოსალოდნელია მთელი პროდუქციის გაფუჭება.


თქვენი ხაზი ტანსაცმლის დიზაინში...

ყოველთვის ვიცოდი, რომ ერთ დღეს შეიქნებოდა ჩემი ტანსაცმლის ხაზი და ასე, პატარა ნაბიჯებით მივიდოდი მიზნამდე. ძალიან მიყვარს სადედოფლო და სადღესასწაულო სამოსზე მუშაობა. დიდი გამოცდილება მაქვს და ძალიან მრავალფეროვანი დიზაინის ლაბადების შექმნაც შემიძლია, მაგრამ მოცემულ მდგომარეობაში ასეთ დიდ რამეს ვერ შევეჭიდებოდი. ამიტომ დავიწყე საცურაო კოსტიუმებით. ჩავთვალე, პატარა ნაჭრებზე მუშაობა ადვილი იქნებოდა, თუმცა ქსოვილებისა და აქსესუარების თავისებურობიდან გამომდინარე, უფრო რთული აღმოჩნდა, ვიდრე წარმოვიდგენდი. ბევრი ახალი რამის სწავლა მომიწია. გავეცანი დღევანდელ საცურაო კოსტიუმების ბაზარს და დიზაინერებს, ვის რა ხარისხი ჰქონდა და ვინ როგორ მომხმარებელზე მუშაობდა. ვიპოვე ჩემი ნიშა და შევქმენი ისეთი კოლექცია, რომელიც ძალიან მაღალი ხარისხისაა, ესთეტიკურად გამორჩეული, ელეგანტური და საკმაოდ სექსუალური. ზუსტად ისეთი, როგორიც ძლიერ, თავდაჯერებულ, დახვეწილ ქალს შეეფერება და ესიამოვნება.


ძლიერი მხარე, რაც განგასხვავებთ სხვა დიზაინერებისგან.

პირველ რიგში, დავიწყებ იმით, რომ ვარ პერფექციონისტი. ეს თვისება ძალიან პოზიტიურ რაკურსში უნდა განვიხილო. სწორედ პერფექციონიზმისკენ მიდრეკილებამ მიმიყვანა იმ შედეგამდე, რომ ჩემი ბრენდი უფრო ადრე არ დაიბადა. სამაგიეროდ, შევქმენი ზუსტად ის, რაც ჩემი აზრით, არის საუკეთესო. ახალი დიზაინერების თანმდევ სირთულეებზე საუბრისას ვახსენე, რომ კოლექციის შექმნა ბევრ ეტაპს საჭიროებს. საბედნიეროდ, მაქვს ცოდნა და გამოცდილება ყველა ეტაპს თავი გავართვა. საცურაო კოსტიუმების შექმნისას სრულიად ვარ ჩართული პროცესში. იქიდან გამომდინარე, რომ პროფესიონალი ვარ, ყველა თარგი და ეგზემპლიარი ჩემი შექმნილია. ზოგჯერ რამდენიმე მილიმეტრიანი სხვაობის გამოც კი ვცვლი თარგს და ახალს ვქმნი, რომ სრულყოფილი და სხეულზე საუკეთესოდ მორგებული იყოს.


როგორ ქსოვილებს და აქსესუარებს იყენებთ?

ქსოვილებს იტალიაში ვუკვეთავ და უმაღლესი ხარისხისაა. აქსესუარები კი სპეციალური მეტალით არის შექმნილი, რომელიც ზღვასა და ქლორიან წყალს უძლებს.


კიდევ რით გამოარჩევთ თქვენს ნამუშევრებს?

ეს ალბათ ყველასთვის ადვილი შესამჩნევია. ჩემი პროდუქცია დახვეწილი გემოვნების მომხმარებლებისთვის იქმნება, რომლებიც ზრუნავენ გარემოზე და სურთ, რომ შენაძენმა მოდის ცვლილებებს გაუძლოს. ასევე, სამოსს ჩემი ხელით დამზადებული დეტალებით ვაფორმებ.


სად იკერება პროდუქცია?

პროდუქცია მანჰეტენზე, ერთ-ერთ საუკეთესო ატელიეში იკერება. ბოლო დეტალებს კი თავად ვამატებ. ზოგჯერ არის შემთხვევები, როცა არასტანდარტული დიზაინის საცურაო კოსტიუმს მიკვეთავენ. ამ დროს თავიდან ბოლომდე თავად მიწევს მუშაობა.


ბრენდის სიმბოლოდ ყვავილი გაქვთ...

დიახ, ეს არის ფრანგიპანის ყვავილი, რომელიც რომანტიკისა და ვნების სიმბოლოდ ითვლება. ვქმნი ყვავილის დეტალებს და საცურაო კოსტიუმებზე ხელით ვაკერებ. გარდა იმისა, რომ ძალიან ლამაზი და გამორჩეულია, ასევე კუტიურულ ნამუშევრად ითვლება.


და მაინც, რა არის 2023 წლის ტრენდი და რა უნდა გაითვალისწინონ მოდის მოყვარულებმა?

გულწრფელად გეტყვით, არ მიყვარს ტრენდები, რადგან მოკლევადიანია და ხშირად იცვლება. ეს იმას ნიშნავს, რომ მომხმარებელს ვაიძულოთ კიდევ მეტი ახალი სამოსი იყიდოს, რომელიც რამდენიმე თვეში სხვამ უნდა ჩაანაცვლოს. ეს არის სწრაფი მოდის ხრიკი, მეტი დაბალხარისხიანი და იაფი სამოსი გაიყიდოს. გარემოსთვის მიყენებულ ზიანზე რომ არაფერი ვთქვათ, მომხმარებელს დიდი ფინანსური ზარალი ადგება. ამიტომ ვქმნი პროდუქტს, რომელიც დამზადებულია მოდის მდგრადი სტანდარტებით. რაც შეეხება წლევანდელ ტრენდს, მაღალწელიანი და ისევ მაღლად აჭრილი საცურაო კოსტიუმებია აქტუალური. ასევე, ამოჭრილი დეტალებიც საკმაოდ ტრენდულია.


მოდის კვირეულებში თუ მიგიღიათ მონაწილეობა?

არა. იყო შემოთავაზებები მაიამის საცურაო კოსტიუმების მოდის კვირეულიდან, მაგრამ ამ ეტაპზე ამით არ ვარ დაინტერესებული.


ცოტა რამ პირად ცხოვრებაზეც მოგვიყევით…

ფერეტი ჩემი იტალიელი მეუღლის გვარია. ისიც ახალი ემიგრანტია და ერთად ვაწყობთ აქაურ ცხოვრებას. გვყავს ერთი შვილი.


როდესაც იქორწინეთ, სამი საქორწინო კაბის შექმნა მოგიწიათ...

დიახ, ორი ქორწილი გადავიხადეთ. ერთი აქ და მეორე იტალიაში. სამივე კაბა ჩემთვის შევქმენი. სხვათაშორის, კურიოზებიც ახლდა ამ ამბავს. არ მინდოდა მეუღლეს რომელიმე კაბა ქორწილის დღემდე ენახა და ხშირად ვაიძულებდი გარეთ გასვლას.


როგორ ახერხებთ დატვირთულ სამუშაო გრაფიკს დედობა შეუთავსოთ?

ჩემი შვილი წლინახევრის არის და ძალიან რთულია სრული განაკვეთით მუშაობის შემდეგ მზრუნველი დედაც ვიყო და ასევე, საცურაო კოსტიუმების კოლექციის შესაქმნელად და კერძო შემკვეთებისთვის დრო გამოვყო. როდესაც ბავშვს სძინავს, მხოლოდ მაშინ ვახერხებ მუშაობას.


რა გასწავლათ აშშ-მ როგორც პიროვნებას, ასევე შემოქმედს?

აქ სხვანაირად გავიაზრე და გავითავისე დროის, ფულის შოვნის, მძიმე შრომისა და ურთიერთობების ფასი. როგორც შემოქმედს, აშშ-მ ის მასწავლა, რომ თუ ბევრს ვიშრომებ და არ ვუღალატებ ჩემს ინტერესებსა და შესაძლებლობებს, აუცილებლად მივაღწევ წარმატებას.


სამომავლო გეგმების შესახებ რას გვეტყვით?

შემოქმედი ვარ და ერთ ადგილზე ვერ ვჩერდები. ყოველთვის მაქვს და მექნება ახალი იდეები. ვგეგმავ, საცურაო კოსტიუმების ხაზს საკურორტო ზონებისთვის მორგებული ტანსაცმელი დავამატო. ჯერჯერობით ეს არის, რისი თქმაც შემიძლია.


ესაუბარა ქეთი იმერლიშვილი
ექსკლუზიურად GOGA.TV-სთვის
3.2К
9 თ, 3 კ წინ