21 მაისს კვირა საღამოს “ისტ ჰემპტონის” ლოკალური ტელევიზიის “LTV”-ის საკონცერტო დარბაზში ნიუ-იორკში დაარსებული ქართული ანსამბლის “ჯორჯიას” პირველი სადებიუტო კონცერტი გაიმართა.
კონცერტის ორგანიზატორი იყო ტელეკომპანია “LTV”-ის დირექტორი, ბატონი Michael D. Clark, რომელმაც ანსამბლის ერთ-ერთი წევრი ილია ათანელიშვილი შემთხვევით გაიცნო, მოიხიბლა მისი ხმით და შესთავაზა კონცერტი ჰემპტონებში ჩაეტარებინა.
საღამოს ესწრებოდნენ ადგილობრივი ამერიკელი და ბრუკლინიდან ჩამოსული ქართველი გულშემატკივრები.
ბიჭებმა შეასრულეს ქართული სიმღერები და ნამდვილი ქართული ცეცხლი დაანთეს.
დარბაზში ტაში არ წყდებოდა.
კონცერტის წამყვანი იყო ყველასათვის ცნობილი და საყვარელი სოსო თოლორაია.
საღამოს ასევე ამშვენებდა ქორეოგრაფიული ანსამბლი ,,ელვას” მოცეკვავეების მიერ შესრულებული ქართული ცეკვები. ( მალხაზ შუბითიძე, ლევან ტორჩინავა, გიორგი ალიმბარაშვილი, ილია სვიანაიძე, თენგიზ ქობალია.)

ანსამბლი “ჯორჯიას” შექმნის იდეა თითოეული ანსამბლის წევრის სურვილი იყო. ერთმანეთი სიმღერის სურვილმა და სიყვარულმა დააკავშირათ.
ანსამბლის წევრები არიან:
დირექტორი, სოლისტი და ლოტბარი ზაზა ბაჩილავა.
იოსებ ტყეშელაშვილი ბანი სოლისტი.
თეიმურაზ ახობაძე მეორე ხმა. ბარიტონი სოლიტი.
დავით რატიანი ბარიტონი მეორე ხმა.
ბექა ბოჭორიშვილი პირველი ხმა სოლისტი.
ილია ათანელიშვილი დაბალი ბანი. ანსამბლ ,,ჯეორჯიას ‘’ მენეჯერი.
ზაზა გუბელაძე პირველი ხმა სოლისტი.
ანსაბლმა რეპეტიციები სულ რაღაც ერთი წლის წინ დაიწყო და დღემდე აქტიურად სწავლობენ ახალ სიმღერებს.
“GogaTV” ანსამბლის ერთ-ერთ წევრს, ბატონ ილია ათანელიშვილს გაესაუბრა.
მან ძალიან ლამაზი ისტორია გვიამბო.
“მე ვმუშაობ “New York soundproofing system” კომპანიაში. “LTV”-ის სტუდიაში ერთ-ერთ ოთახში მიგვიწვიეს ხმის დასახშობად. მუშაობის დროს ვმღეროდი ქართულ მელოდიას, რომელიც მოისმინა სტუდიის მენეჯერმა ჰელენმა. ჩემი ნამღერით გაოცებულმა მკითხა თუ რა სიმღერას ვმღეროდი. მე მოვუყევი ქართული სიმღერის შესახებ და ვუთხარი ანსამბლ “ჯორჯიაზე.” ჰელენმა შემომთავაზა კონცერტის ჩატარება და გამაცნო მისტერ მაიკლ კლარი. სწორედ მათი დახმარებით შედგა დღევანდელი საღამო და მათი დიდი მადლიერი ვარ. ერთობლივად შევძელით კონცერტის ჩატარება.
მადლობა თქვენ “GogaTV”-ის ინტერესისთვის და გულშემატკივრობისთვის.”
ჩვენ რა თქმა უნდა ილიას და მის მეგობრებს დიდ წარმატებებს ვუსურვებთ და ვიმედოვნებთ მომავალშიც გაახარებენ ამერიკელ და ქართველ მსმენელს.
უღრმესი მადლობა ქართული სიმღერისა და კულტურის პოპულარიზაციისთვის.



ავტორი: ცისნამი საყვარლიშვილი