15 ივლისს, შაბათს საღამოს 18 საათზე, საქართველოს პარლამენტის ილია ჭავჭავაძის სახელობის ეროვნულ ბიბლიოთეკაში ( გუდიაშვილის 7, თბილისი ) გაიმართება ცნობილი ქართველი ემიგრანტის - ცისნამი საყვარლიშვილის პირველი წიგნის “წითელთმიანი გოგონას დღიურის” პრეზენტაცია.
ცისნამი 14 წელია ემიგრაციაშია. აქედან ოთხი წელი იტალიის ულამაზეს ქალაქ ფლორენციაში გაატარა, სადაც დაამთავრა ფლორენციის სახელმწიფო უნივერსიტეტის პოლიტიკურ მეცნიერებათა ფაკულტეტი.
10 წელია ნიუ-იორკში ცხოვრობს.
ჰყავს მეუღლე და ერთი შვილი.
წიგნი თავის შვილს - ირაკლი შიოლაშვილს მიუძღვნა.
“წითელთმიანი გოგონას დღიური” ემიგრაციაში ცხოვრების დროს შეიქმნა, სავსეა ნამდვილი ადამიანური ემოციებითა და ემიგრანტული თავგადასავლებით.
”ცისნამი საყვარლიშვილი განცდის ადამიანია. განცდის და ფიქრისაც, მაგრამ ვფიქრობ, რომ უფრო განცდის, რამდენადაც მას ვიცნობ და მით უფრო, რაც ამ წიგნში წავიკითხე. ეს არის ფრაგმენტული დღიური იმ თითქოს ნაცნობ და ამავდროულად სრულიად უცნობ ქარტეხილებზე, რაც გარდაუვალი გამოდგა ოთხმოცდაათიანების თაობისთვის და განსაკუთრებით, ცხადია რომ, ქალებისთვის. თითქოს ნაცნობს, იმიტომ რომ აღწერილი გზა ათასობით ქართველმა ემიგრანტმა გაიარა, ხოლო უცნობს, იმიტომ რომ ყველა გზა, მიუხედავად გარეგნული და ზედაპირული მსგავსებისა, უკიდურესად პერსონალურ ისტორიებს გულისხმობს: მარცხებს და გამარჯვებებს, რომელიც მხოლოდ მათია და მათგანაა”- ასე ახასიათებს ცისნამი საყვარლიშვილს წინასიტყვაობაში მწერალი და წიგნის რედაქტორი გიორგი კეკელიძე.
წიგნის კორექტორ მარეხ ბეჟანიშვილის თქმით:
“წითელთმიანი გოგონას დღიური" ისეთივე ლაღი, მსუბუქი, ენერგიითა და სიყვარულით სავსე წიგნია, როგორიც თავად მისი ავტორი ცისნამი საყვარლიშვილი.
წიგნი არის ემიგრაციაში დაგროვილი ემოციები: ნოსტალგია, მონატრება, უშვილოდ ყოფნის დარდი, სამშობლოს სიყვარული, მომავლის დიდი იმედი და სიყვარული.”
“GogaTV” ცისნამი საყვარლიშვილს დაუკავშირდა.
გთავაზობთ მის კომენტარს.
“10 წელია სამშობლოში არ ვყოფილვარ და ერთი სული მაქვს როდის ჩავისუნთქავ მშობლიურ ჰაერს.
“წითელთმიანი გოგონას დღიური” არის ჩემი მარგალიტი. ეს წიგნი უკვე ისე მიყვარს, როგორც საკუთარი შვილი. უკვე გამომცემლობა “ინტელექტს” ჩაბარდა და მალე დაიბეჭდება.
მადლიერი ვარ ყველასი ვინც დამეხმარა, რომ ჩემი ოცნება რეალობად მექცია. მადლობა წიგნის რედაქტორს - ბატონ გიორგი კეკელიძეს, კორექტორს - მარეხ ბეჟანიშვილს და გამომცემლობა “ინტელექტს.” უამრავი შრომა გასწიეს რომ ჩემი წიგნი კოპწია გამოვიდეს.
პრეზენტაციაზე ველოდები მთელ საქართველოს, ჩემს მონატრებულ მეგობრებს, ძვირფასს ადამიანებს, ყველას ვინც მიცნობს თუ არ მიცნობს.
ვიცი შუაგულ ზაფხულში ხალხი თბილისიდან გადის, მაგრამ მათ სიყვარული მოიყვანს.
საქართველოში არ არსებობს ოჯახი ვისაც ოჯახის ერთი წევრი მაინც არ ჰყავდეს ემიგრაციაში. წიგნი ეხება ემიგრაციას. ყველა ემიგრანტი დედა საკუთარ თავს ამოიკითხავს.
ჩემს შვილს მივუძღვენი, ჩემს ირაკლის, მასთან განშორების დროს, ტკივილსა და დარდს.
ეს გრძნობები ემიგრანტებისთვის ცნობილია.
გელოდებით ყველას.
არ დაიზაროთ და აუცილებლად მობრძანდით წიგნის პრეზენტაციაზე 15 ივლისს.
მინდა ჩაგეხუტოთ და მოგეფეროთ.
თქვენი სითბო და სიყვარული მჭირდება.
მიყვარხართ.”
ასეთი ემოციებით გაგვესაუბრა “წითელთმიანი გოგონას დღიურის” ავტორი.
“GogaTV” ცისნამის წარმატებებს უსურვებს და სამშობლოში მშვიდობით დაბრუნებას.