"ქართველებზე არ იყიდება!'' - სოციალურ ქსელში გამოჩნდა განცხადება, რომლის მიხედვითაც, საქართველოში შეძენილ კერძო საკუთრებას, სავარაუდოდ, რუსეთის მოქალაქე ყიდის. მას შემდეგ, რაც მის პოსტს უკმაყოფილება მოჰყვა, ავტორმა განცხადება წაშალა და სატელეფონო ზარებს აღარ უპასუხა.

"მთავარ არხთან" დეგი სუხიშვილი, ყვება, რომ განცხადების ნახვის შემდეგ ავტორს დაურეკა. ის უძრავი ქონების სააგენტო "ციტადელის" მფლობელია და რუსეთის მოქალაქესთან დეტალების გარკვევა სცადა:

"ვნახე პოსტი სადაც რუსულად ეწერა, რომ ვყიდი ბინას და ქართველებზე არ ვყიდი. ვნახე ნომერი და ეგრევე დავუკავშირდი, რუსულად ვესაუბრებოდი, რუსი იყო. იმის შესამოწმებლად თუ ნამდვილად ყიდდა ვკითხე სააგენტოებთან თუ თანამშრომლობდა, მითხრა რომ კი ვთანამშრომლობ, ვუთხარი, რომ თქვენ არ ხართ ამ ქვეყანაში მიღებული, დაბრუნდით თქვენ ქვეყანაში, შეურაცხყოფაზე გადმოვიდა. დიდხნიანი დიალოგის შემდეგ, გამითიშა", - ყვება მოქალაქე.

ცნობისთვის, უკრაინაში ომის დაწყების შემდეგ, განსაკუთრებით კი იმ პერიოდიდან, როცა რუსეთმა ნაწილობრივი მობილიზაცია გამოაცხადა საქართველოში ათასობით რუსეთის მოქალაქე შემოვიდა.