მიხეილ სააკაშვილის საქმე ბრიტანული მედიის ყურადღების ცენტრშიც მოხვდა. ბრიტანეთი ერთ-ერთია იმ ქვეყნებს შორის, რომელმაც მოსკოვის საპატიმროში იურისტ სერგეი მაგნიტსკის სიკვდილთან და რუსეთის ბიუჯეტიდან 230 მილიონი დოლარის გაფლანგვის საქმესთან დაკავშირებით, რუსეთის მოქალაქეებს სანქციები დაუწესა.

ამჯერად ბილ ბროუდერს "თაიმს-რადიომ" დაუთმო ეთერი, სადაც მან კიდევ ერთხელ ხაზი გაუსვა რომ მიხეილ სააკაშვილი საქართველოს ხელისუფლების პოლიტიკური ტყვეა და ის აუცილებლად უნდა გათავისუფლდეს.

"საქართველოს ხელისუფლება არის პრორუსული. მათთან პუტინს დიდი გავლენები აქვს. არ არსებობს სამართლებრივი საფუძველი იმისა, რომ სააკაშვილი ახლა პატიმრობაში იმყოფებოდეს. მაშინ, როდესაც პუტინს 2008 წელს საქართველოს მიტაცება სურდა, სააკაშვილი მას შეეწინააღმდეგა. ამიტომ ის პუტინის სამიზნე გახდა. ის მისი მტერია და სურს, შური იძიოს. მან 40-50 კილო დაკარგა. არის ნაწამები. ექსპერტები საუბრობენ მის მოწამვლაზე. უნდა იცოდეთ, რომ ეს საქმე პოლიტიკურადაა მოტივირებული. ის კვდება და ამიტომ, დაუყონებლივ უნდა გათავისუფლდეს მკურნალობის მიზნით. მე წარსულში მსგავსი რამ უკვე ნანახი მაქვს. ეს არის სერგეი მაგნიტსკი, რომელიც იყო ნაწამები და საბოლოოდ პატიმრობაში ნელი და მტანჯველი სიკვდილით მოკლეს. რადგან მე ვიყავი მისი მკვლელობის მოწმე, შედგა სერგეის მკვლელების სია, რომელსაც დაერქვა "მაგნიტსკის აქტი". რაც მე ვიხილე სააკაშვილის შემთხვევაში, ესეც არის ადამიანის უფლებებს უხეში დარღვევა, ამიტომ მაგნიტსკის სიას უნდა დაემატონ ადამიანები, რომლებიც სააკაშვილს აწამებენ და კლავენ",- ამბობს ბილ ბროუდერი.

ცნობისთვის, "მაგნიტსკის" აქტის ავტორს, ბილ ბროუდერს საქართველოს მესამე პრეზიდენტმა მიხეილ სააკაშვილმა მიმართა, რომ დახმარებოდა ადგილობრივ ქართულ ჯგუფებს "მაგნიტსკის სიის" ანალოგის შედგენაში. ბროუდერმა მესამე პრეზიდენტს წერილითვე უპასუხა და დაპირდა, რომ ყველაფერს გააკეთებს, შესაბამისი ჩამონათვალი მაგნიტსკის აქტს დაემატოს.