საქართველოს მესამე პრეზიდენტის, მიხეილ სააკაშვილის მხარდასაჭერად საქრთველოსა და ევროპის ქალაქებში გამართულ აქციებზე - "გადაარჩინე მიშა" სტატია მოამზადა საერთაშორისო მედია Euronews-მა. 

სტატიაში ხაზგასმულია, რომ აქციის მოინაწილეები მესამე პრეზიდენტის ჯანმრთელობის მდგომარეობის გაუარესების გამო, მის გათავისუფლებას ითხოვენ.

ავტორი წერს, რომ მიხეილ სააკაშვილის ჯანმრთელობის მდგომარეობა 2021 წლის ოქტომბერში, დაპატიმრების შემდეგ გაუარესდა და აღნიშნულია, რომ მესამე პრეზიდენტმა პატიმრობის გამო, პროტესტის ნიშნად არაერთხელ დაიწყო შიმშილობა. 

"ყოფილი პრეზიდენტი უკრაინაში ცხოვრობდა, როდესაც მას 2018 წელს საქართველოში დაუსწრებლად მიუსაჯეს, ის [საქართველოში] დაბრუნებისთანავე დააკავეს. ამჟამად იხდის ექვსწლიან პატიმრობას საქართველოს ციხეში - უფლებამოსილების ბოროტად გამოყენებისა და პარლამენტის ოპოზიციონერი წევრის ცემის მტკიცებულებების დამალვისთვის, როდესაც ის თანამდებობაზე იყო.მაგრამ მისი მხარდამჭერები თვლიან, რომ სასამართლოს გადაწყვეტილება პოლიტიკურად მოტივირებულია. მმართველ პარტიასა და ოპოზიციას შორის დაძაბულობა 2021 წლის საპარლამენტო არჩევნების შემდეგ გაძლიერდა",- ვკითხულობთ სტატიაში. 

ავტორი ყურადღებას ამახვილებს ფაქტზე, რომ საერთაშორისო და ადგილობრივი ექიმების თქმით, 55 წლის ოპოზიციონერი პოლიტიკოსი სწრაფად პროგრესირებადი დემენციით იტანჯება.

"ზოგიერთი მათგანი ვარაუდობს, რომ ეს შეიძლება დაკავშირებული იყოს პატიმრობაში ყოფნისას მძიმე ლითონებით მის სავარაუდო მოწამვლასთან. ისინი სასჯელის შეჩერებასა და სამკურნალოდ საზღვარგარეთ გადაყვანას ითხოვენ.

თუმცა საქართველოს ოფიციალური პირები უარყოფენ, რომ ყოფილი პრეზიდენტი კრიტიკულ მდგომარეობაშია და აცხადებენ, რომ ის ცდილობს ხელი შეუშალოს სასამართლო პროცესს და შეცდომაში შეიყვანოს საზოგადოება და საერთაშორისო პარტნიორები.",- აღნიშნავს სტატიის ავტორი.