ევროპარლამენტმა საქართველო-ევროკავშირის ასოცირების შეთანხმების შესრულების შესახებ რეზოლუცია მიიღო. კენჭისყრაზე რეზოლუციას 608 ევროპარლამენტარიდან 430-მა დაუჭირა მხარი, 52-მა წინააღმდეგ მისცა ხმა, ხოლო 126-მა თავი შეიკავა.

ევროპარლამენტმა კენჭი უყარა რეზოლუციას მასში შესული ახალი შესწორებებით - საქართველოს მესამე პრეზიდენტზე და "ოცნების" დამფუძნებელ ბიძინა ივანიშვილზე. ორივე შესწორების ავტორი ევროპარლამენტარი მირიამ ლექსმანია. 

ბიძინა ივანიშვილზე:

"ხაზს ვუსვამთ ეკონომიკურ, პოლიტიკურ და საზოგადოებრივ ცხოვრებაში ცალკეული ადამიანების პირადი ინტერესების გადაჭარბებული გავლენის აღმოფხვრის აუცილებლობას, როგორც ევროკომისიის მიერ განსაზღვრულ ერთ-ერთ პრიორიტეტს, რომელიც უნდა განიხილებოდეს საქართველოს კანდიდატის სტატუსის მინიჭებამდე; რეკომენდაციას ვუწევთ პირადი ინტერესების, განსაკუთრებით ყოფილ პრემიერ-მინისტრ ბიძინა ივანიშვილის გადაჭარბებული გავლენების საკითხის სისტემურ გადაწყვეტას ქვეყნის პოლიტიკური, ეკონომიკური და საზოგადოებრივი ცხოვრების სხვადასხვა სფეროში სტრუქტურული და რეგულატორული რეფორმების გატარების გზით; 

ვიმეორებთ მოწოდებას საბჭოსა და დემოკრატიული პარტნიორების მიმართ, მიიღონ შესაბამისი ზომები, მათ შორის პირადი სანქციების დაწესების გზით ივანიშვილისთვის და ყველა იმ პირისთვის, რომელიც ხელს უწყობს დემოკრატიული პოლიტიკური პროცესის გაუარესებას;"

მიხეილ სააკაშვილზე: 

"გამოვხატავთ სერიოზულ შეშფოთებას ექიმ დევიდ ე. სმითის ტოქსიკოლოგიურ ანგარიშთან დაკავშირებით, რომელშიც ნათქვამია, რომ მიხეილ სააკაშვილის მიერ გამოვლენილი მრავალი პათოლოგიური სიმპტომი მძიმე მეტალებით მოწამვლის შედეგია, რაც ხელს უწყობს მისი ჯანმრთელობის სწრაფ გაუარესებას; ვიმეორებთ, რომ საქართველოს მთავრობას ეკისრება სრული პასუხისმგებლობა ყოფილი პრეზიდენტის ჯანმრთელობასა და კეთილდღეობაზე და უნდა აგოს პასუხი, თუ მას რაიმე დაემართება; მოვუწოდებთ საქართველოს პრეზიდენტს გამოიყენოს თავისი კონსტიტუციური პრეროგატივები ამ საკითხის გადასაჭრელად; მოვუწოდებთ კომისიის ვიცე-პრეზიდენტს/ევროკავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში, აქტიურად ჩაერთოს ყოფილი პრეზიდენტის გათავისუფლებისკენ მიმართულ ძალისხმევაში; ვიმეორებთ მოწოდებას საქართველოს ხელისუფლების მიმართ, გაათავისუფლოს ყოფილი პრეზიდენტი მიხეილ სააკაშვილი და მისცეს მას სათანადო მკურნალობის საშუალება საზღვარგარეთ, საქართველოს სისხლის სამართლის საპროცესო კოდექსის 283-ე მუხლის შესაბამისად, ჰუმანიტარული ნიშნით და როგორც პოლიტიკური პოლარიზაციის შემცირების საშუალება;

ტექსტში საუბარია "მთავარი არხის" გენერალური დირექტორის, ნიკა გვარამიას პატიმრობაზე. ევროპარლამენტარები პრეზიდენტს მისი შეწყალებისკან მოუწოდებენ: 

"მოვუწოდებთ საქართველოს ხელისუფლებას, შეწყვიტოს პოლიტიკურად მოტივირებული სისხლის სამართლის საქმეები და გადახედოს მიმდინარე სისხლის სამართლის საქმეებს მედიის მუშაკების, ხელისუფლების მიმართ კრიტიკული მედია საშუალებების მფლობელებისა და მათი ახლო ოჯახის წევრების წინააღმდეგ; ამ კუთხით ვიხსენებთ ტელეკომპანია „მთავარის“ დირექტორ ნიკა გვარამიასა და სხვა მედიასაშუალებების რეჟისორებისა და დამფუძნებლების საქმეს, როგორიცაა ფორმულა TV და პირველი TV; გამოვთქვამთ ღრმა შეშფოთებას იმის გამო, რომ 2022 წლის 2 ნოემბერს თბილისის სააპელაციო სასამართლომ ძალაში დატოვა ნიკა გვარამიას განაჩენი, რომელიც ეფუძნება საეჭვო ბრალდებებს, მიუხედავად საქმის მიმართ წამოჭრილი მნიშვნელოვანი კითხვებისა, კერძოდ მის ვადასა და ბრალდებებზე; მოვუწოდებთ საქართველოს პრეზიდენტ სალომე ზურაბიშვილს, შეიწყალოს ნიკა გვარამია; ვიხსენებთ კომისიის მიერ 2022 წლის 17 ივნისის მოსაზრებაში მითითებულ ძირითად პრიორიტეტებს, მათ შორის მოწოდებას საქართველოს ხელისუფლებისადმი, უზრუნველყონ, რომ მედიის მფლობელების წინააღმდეგ აღძრული სისხლის სამართლის პროცედურები შეესაბამებოდეს უმაღლეს საკანონმდებლო სტანდარტებს; იმედს ვიტოვებთ, რომ ევროპის საგარეო მოქმედებების სამსახური და ევროკავშირის წარმომადგენლობა საქართველოში გააგრძელებენ ადგილზე მონიტორინგს საქართველოში განხორციელებულ ყველა სასამართლო პროცესზე, რომელიც დაკავშირებულია პოლიტიკურად მოტივირებულ საქმეებთან;"