მიხეილ სააკაშვილი კლინიკაში დღეს მისმა ადვოკატებმა მოინახულეს. ვალერი გელბახიანის თქმით, მდგომარეობა უფრო და უფრო მძიმდება და სახელმწიფომ ყველა საჭირო ზომა უნდა მიიღოს იმისთვის, რომ მესამე პრეზიდენტის სიცოცხლეს საფრთხე არ დაემუქროს. გელბახიანის შეფასებით, ეს საფრთხე დიდია:

მიხეილ სააკაშვილი ელოდება ორშაბათს, ან სამშაბათს ამ კვლევის შედეგებს და ჩვენ ყველას დიდი ინტერესი გვაქვს იმიტომ, რომ არის ნიშნები, რომ არსებობს ტუბერკულოზის დაავადების ნიშნები და თუ ამ კვლევამ დაადასტურა, რომ მას აქვს ტუბერკულოზი, ეს ცალკე საგანგაშო თემაა. მძიმეა მდგომარეობა, ვერ მოძრაობს, არის წოლით რეჟიმზე, ადამიანური ფერი დაკარგული აქვს. ერთადერთი რაც შერჩენია ძველი სააკაშვილისგან, არის მეტყველება, მეტი დანარჩენი ვერ იტყვით, რომ ის სააკაშვილია ვინც გინახავთ ოდესმე." ამბობს ადვოკატი ვალერი გელბახიანი.

მიხეილ სააკაშვილს მაგნიტო რეზონანსული ტომოგრაფია რესპუბლიკურ საავადმყოფოში გუშინ ჩაუტარდა, ვივა მედის დირექტორის განმარტებით მესამე პრეზიდენტის სხვა კლინიკაში გადაყვანა, აპარატის ტექნიკური გაუმართაობის გამო გახდა აუცილებელი. ეს კვლევა კი სავარაუდოდ ტუბერკულოზის სავარაუდო დიაგნოზს უკავშირდება. როგორც ცნობილია, ტუბერკულინის ტესტმა დადებითი პასუხი აჩვენა და ექიმებმა გამოთქვეს ვარაუდი , რომ შესაძლოა ამ დაავადების კერა არსებობდეს. კვლევის შედეგების მიღების შემდეგ, ვივა მედში კონსილიუმი შეიკრიბება და შედეგებზე იმსჯელებს.