"შეიძლება სპეკულაციებად მოინათლოს ჩემი მხრიდან, მაგრამ რადგან ჩემს აზრს მეკითხებით, ვარაუდს გაგანდობთ. მე უფრო ასეთი შთაბეჭდილება დამრჩა, იმიტომ რომ მე ძალიან ყურადღებით წავიკითხე ეს დოკუმენტი დედანში და ასეთი განცდა დამრჩა, რომ რაკი ქართული ოცნება, მოდით ასე დავარქვათ - ეს ოხერი ქართული ოცნება, რომელსაც ვერავინ ვერაფერი მოუხერხა, ათი წელი გავიდა და 25 ოქტომბერს შესრულდა 10 წელი ზუსტად, რაც ქართულ ოცნებას ჰყავს თავისი მთავრობა უწყვეტად, ვერაფერი მოუხერხეს. რაკი ვერაფერი მოუხერხეს, ახლა რაღაც სხვა ხერხები უნდა გამოვიგონოთ ალბათ, თან ვხედავთ რომ ეს ქართული ოცნებები სხედან პარლამენტში და თავი არ აუწევიათ, მუშაობენ და შეიძლება ისეც მოხდეს, რომ ტექნიკურად, ანუ ქაღალდზე და კანონსა და პრაქტიკაში ეს 12 რეკომენდაცია ამათმა შეასრულონ, ისე აიწყვიტეს, რომ შეასრულებენ და მოდი ახლა გამოვუშვათ ტექსტი, რომელიც შექმნის ნოყიერ ნიადაგს იმისთვის, რომ მერე თუ დაგვჭირდა ვთქვათ უარი, ვარაუდია ეს ჩემი, ვიღაცამ შეიძლება თქვას, რომ სპეკულირებაა - კი ბატონო თქვა, მაგრამ რაკი მეკითხებით, გპასუხობთ. ამას უფრო ჰგავს, კიდევ უფრო იმიტომ ჰგავს, რომ ჩვენ მივიღეთ სრულიად უსამართლო გადაწყვეტილება, როცა მოლდოვას და უკრაინას უთხრეს, რომ შე ხარ კარგი მოწაფე - აჰა შენ ხუთიანი და საქართველოს, რომელიც მართლა კარგი მოწაფეა, იმას უთრეს, რომ წადი ახლა შენ დაჯექი მოსაფიქრებელში და იმეცადინე", - თქვა თეა წულუკიანმა.

ცნობისთვის, გუშინ 8 ნოემბერს ევროპარლამენტის საგარეო კომიტეტის სხდომაზე მხარი დაუჭირეს საქართველოს მიერ ევროკავშირის ასოცირების შეთანხმების შესრულებასთან დაკავშირებულ ანგარიშში კომპრომისულ ცვლილებებს.

დოკუმენტში საუბარი შეეხო მთავარი არხის გენერალური დირექტორის, ნიკა გვარამიას პატიმრობას. ევროპარლამენტმა საქართველოს ხელისუფლებას მოუწოდა, შეწყვიტოს პოლიტიკურად მოტივირებული სისხლის სამართლის საქმეები.

დოკუმენტში ასევე საუბარი იყო მიხეილ სააკაშვილზე. "შესწორებების ახალ ვერსიაში ნათქვამია, რომ "საქართველოს ხელისუფლებამ გაათავისუფლოს ყოფილი პრეზიდენტი მიხეილ სააკაშვილი და მისცეს მას უფლება, გაიაროს სათანადო სამედიცინო მკურნალობა საზღვარგარეთ ჰუმანიტარული ნიშნით".

ნახსენები იყო ბიძინა ივანიშვილიც - ევროპარლამენტი იძლევა რეკომენდაციას,"მოგვარდეს ბიძინა ივანიშვილის გადაჭარბებული გავლენა ქვეყნის პოლიტიკურ, ეკონომიკურ და საზოგადოებრივ ცხოვრებაზე".