მთვარის სრული დაბნელება კუროს ნიშანში 8 ნოემბერს იქნება - როგორ შეცვლის ეს ასტროლოგიური მოვლენა თქვენს ცხოვრებას

25 ოქტომბერს მორიელის ნიშანში მზის ნაწილობრივი დაბნელებაა, 8 ნოემბერს კი კუროს ნიშანში მთვარის სრული დაბნელება გველის. ეს ასტროლოგიური მოვლენა ზოდიაქოს თითოეულ ნიშანზე იმოქმედებს. მაგრამ, თუ თქვენი მზე მორიელის ან კუროს ნიშანშია, მაშინ, სავარაუდოდ, გავლენას კიდევ უფრო მეტად იგრძნობთ. ასტროლოგების თქმით, თუ დაბნელება თქვენს დაბადების დღის თარიღს ემთხვევა, მაშინ საკუთარ ჯანმრთელობას განსაკუთრებული ყურადღება უნდა მიაქციოთ.

კურო მიწის ნიშანია, რომელიც ბუნებასა და მატერიალურ სამყაროს განასახიერებს. ზოდიაქოს ეს ნიშანი დაკავშირებულია იმასთან, რაც ყოველდღიურად გვჭირდება, იქნება ეს ფინანსები, ძირითადი საჭიროებები თუ სხვა. ასევე, გავლენას ახდენს ჩვენს სილამაზესა და თვითშეფასებაზე. ამიტომაც, მთვარის ამ ნიშანში დაბნელება განსაკუთრებით სწორედ ჩამოთვლილ სფეროებზე იმოქმედებს.

გახსოვდეთ, რომ ყველაფერი, რაც ამ პერიოდში მოხდება, ახალი კი არა, უკვე დიდი ხნის დაგროვილი ემოციის შედეგია. მთვარის დაბნელების მომენტში საკუთარ გრძნობებთან და განცდებთან პირისპირ შეხედვა მოგვიწევს. დაბნელებაზე რეაქცია ძალიან ინდივიდუალურია: ზოგიერთი ჩვენგანი შეიძლება გაღიზიანებული იყოს და ზუსტად არ იცოდეს, რატომ. ბევრი ადამიანი კი სიტუაციას არაობიექტურად აღიქვამს, მხოლოდ იმას დაინახავს, რაც თავად სურს. ამან კი შესაძლოა კონფლიქტამდე მიგიყვანოთ. გახსოვდეთ, რომ მთვარის დაბნელების დროს თქვენი ნებისმიერი რეაქცია გადამეტებული იქნება.

თუმცა, ასტროლოგების მთავარი რჩევაა, რომ საკუთარ გრძნობებსა და ემოციებს ამ პერიოდში კარგად დააკვირდეთ, რადგანაც შეიძლება ისეთი რამ აღმოაჩინოთ, რასაც სამომავლოდ საკუთარ სიძლიერედ გამოიყენებთ.

საუკეთესო პერიოდია, რომ წარსულის შაბლონებისგან გათავისუფლდეთ. გაიაზრეთ ყველა შიში თუ კომპლექსი, რომლებიც თვითრეალიზებაში ხელს გიშლით და ეცადეთ, მათ დაძლევაზე იმუშაოთ. საბოლოოდ თქვით უარი ყველაფერზე, რაც მშვიდად ცხოვრებასა და წარმატებაში ხელს გიშლით. დაემშვიდობეთ ტოქსიკურ ადამიანებს, მოიშორეთ ზედმეტი ნივთები და თქვენი ცხოვრების ახალი ფურცელი განახლებული მიზნებითა და ენერგიით დაიწყეთ.

წყარო: beaumonde.ge
295
1 წლ, 4 თ წინ