ამერიკელი დიპლომატი, ყოფილი ელჩი საქართველოში კენეტ იალოვიცი "ამერიკის ხმასთან" ინტერვიუში ამბობს, რომ იმედგაცრუებულია საქართველოს მთავრობის პოზიციით, რადგან თვლის, რომ ქვეყანა უკრაინას სათანადო მხარდაჭერას არ უცხადებს.

„ახლა არის მომენტი, როცა უკრაინა იბრძვის გადარჩენისთვის. საქართველოც იბრძოდა გადარჩენისთვის... საქართველო აუცილებლად უნდა უჭერდეს მხარს უკრაინას, უფრო პირდაპირ, უფრო მკაფიოდ, სანქციებით და ყველა გზით,“- ამბობს იალოვიცი.

დიპლომატი საქართველოს უფრო მკაფიო პოზიციის დაკავებისკენ მოუწოდებს.

"მე მახსოვს, რომ პრეზიდენტმა შევარდნაძემ, როდესაც ელჩი ვიყავი, მითხრა რომ თუ უკრაინა არასწორი გზით წავიდოდა, საქართველო ვერ გადარჩებოდა და ახლა სწორედ საქართველომ უნდა შეხედოს ამ მომენტს სწორად, რადგან თუ რუსეთი უკრაინაში დიდწილად გაიმარჯვებს, ეს ძალიან საშიში იქნება საქართველოსთვის. მათ ასე უნდა შეხედონ ამ საკითხს, იმიტომ რომ თქვენ იცით, რომ თუ რუსეთი იმპერიის ნაწილს დაიბრუნებს, რისი მცდელობაც აქვს, ეს არ იქნება კარგი საქართველოსთვის“- ამბობს ამერიკელი დიპლომატი.

კენეტ იალოვიცი, რომელიც საქართველოში ამერიკის ელჩად 1998-2001 წლებში მუშაობდა, დღეს ამბობს, რომ საქართველოს მთავრობა საფრთხეებს ვერ აცნობიერებს. „დარწმუნებული არ ვარ, რომ ამაზე ფიქრობენ. მათ აქვთ არგუმენტები, მაგრამ ვფიქრობ რომ ეს არასწორია და იმედგაცრუებული ვარ მათი [საქართველოს მთავრობის] პოზიციით,“- ამბობს იალოვიცი.