"კვლევა ჩატარდა ყოველგვარი გართულების გარეშე როგორც გითხარით და პაციენტი დამაკმაყოფილებელ მდგომარეობაში გადაყვანილია პალატაში. მდგომარეობას არ შევაფასებ, მხოლოდ შემიძლია ვთქვა ის, რომ პაციენტს უკეთდება აბსოლუტურად ყველაფერი მისი სხვადასხვა დაავადებიდან გამომდინარე," - ამბობს "ვივამედის" კლინიკური დირექტორი ზურაბ ჩხაიძე "მთავარ არხთან" საუბრისას.

დამატებითი სამედიცინო პროცედურებისა და კვლევების შემდეგ, ამ წუთებში, საქართველოს მესამე პრეზიდენტი უკვე პალატაშია გადაყვანილი. მიხეილ სააკაშვილის ადვოკატები ამბობენ, რომ გარკვეული კვლევები მას ნარკოზის ქვეშ ჩაუტარდა, რაც მის ჯანმრთელობაზე ცუდად აისახება.

ადვოკატების თქმით, დღესვე დაიწყება ამერიკელი ექსპერტებისთვის ლიცენზიის მიღების პროცედურებიც, იმისთვის, რომ მიხეილ სააკაშვილის ჯანმრთელობის შემსწავლელ ექსპერტიზაში ჩართვა შეძლონ. მათ იმედი აქვთ, რომ შესაბამისი სახელმწიფო უწყებები ამ პროცესსაც არ გააჭიანურებენ.