წარმატებული ქართველების დაჯილდოვება ნიუ-იორკში

21 მაისს, ქალაქ ნიუ-იორკში ამერიკაში მცხოვრები წარმატებული ქართველების დაჯილდოვების ცერემონიალი "Georgians in USA Awards 2022” გაიმართა.
აღნიშნული ღონისძიება ცნობილი ხელოვანის, თამრიკო დავითაშვილის ინიციატივით 2009 წლიდან ტარდება და ქართველი ემიგრანტები ამერიკულ ცხოვრებაში შეტანილი წვლილისთვის ჯილდოვდებიან.
"უკვე მრავალი წელია, რაც ნიუ-იორკის შტატის ასამბლეა საშუალებას გვაძლევს ფართო საზოგადოებას გავაცნოთ ქართველი თანამემამულენი , რომლებსაც წარმატებული კარიერა აქვთ შეერთებულ შტატებში. ვთვლი, რომ აღიარება და დაფასება ერთგვარი მოტივაციაა, იყო იმაზე უკეთესი, ვიდრე დღეს ხარ!- აღნიშნავს ქალბატონი თამრიკო დავითაშვილი.
წელს, ღონისძიება განსხვავებული ფორმატით წარიმართა. მიწვეულები იყვნენ უკრაინელი სტუმრები, რომლებიც სიტყვით გამოვიდნენ და ისაუბრეს როგორც მათ სამშობლოში მიმდინარე მოვლენებზე, ასევე ქართველი ხალხის მხარდაჭერისა და გვერდში დგომის მნიშვნელობის შესახებ. შეგროვდა თანხა უკრაინელი ხალხის დასახმარებლად.
ღონისძიების მეორე ნაწილი ოცდასამი ნომინანტის დაჯილდოვებას მიეძღვნა, ხოლო მესამე ნაწილი კონცერტს დაეთმო, რომელიც ქართული კულტურის ცენტრმა, "ფესვებმა" გახსნა. ღონისძიებას ესწრებოდნენ ძველი ნომინანტებიც.