ქაქუცა კლდიაშვილი დაიბადა 1993 წლის 30 დეკემბერს თბილისში ცნობილი მხატვრის, პაატა კლდიაშვილისა და ფრანგული ენის სპეციალისტის, თამარ ღოღობერიძის ელიტარულ ოჯახში. 34-ე საჯარო სკოლის დასრულების შემდეგ სწავლა განაგრძო საქართველოს უნივერსიტეტში საერთაშორისო სამართლის ფაკულტეტზე. 2014 წელს ისრაელში მიიღო ჯილდო „Послом Доброй Государства Израиль“. იგი ბავშვობიდანვე ავლენდა ხელოვნებისადმი დიდ ინტერესს. მამის მსგავსად შესანიშნავად ხატავდა, გატაცებული იყო ფოტოგრაფიით და ძალიან კარგად ერკვეოდა მუსიკაში, რაც შემდგომ მის საქმიანობაზეც აისახა. მამის გარდაცვალებამ მძიმედ იმოქმედა მასზე, თუმცა მისი აქტიური ცხოვრების წესზე გავლენა არ მოუხდენია და თავდაუზოგავად აგრძელებდა შრომას საკუთარი მიზნების განსახორციელებლად. 2015 წლის აპრილში ბულგარეთის ვიცე-პრეზიდენტის, მარგარიტა პოპოვას მიერ გადაეცა ჯილდო ხელოვნების ფესტივალ „Орфэй в Испания“ -ში მონაწილეობის გამო. იმავე წელს საცხოვრებლად გადავიდა ნიუ-იორკში, სადაც დედასთან და ძმასთან, დავით ტვილდიანთან ერთად ჩამოაყალიბა საერთაშორისო მუსიკალური ფესტივალი „Pearl of New York”, რომელიც ყოველწლიურად უამრავი ქვეყნიდან მასპინძლობს მონაწილეებს. ქაქუცა ფესტივალის გენერალური მენეჯერი გახლდათ.

2017 წელს გაიცნო პროფესიით იურისტი, სალომე სიამაშვილი, რომელთანაც მალევე შექმნა ოჯახი და 2018 წელს შეეძინათ ქალიშვილი, თანანო, რომელსაც საამაყო ბებიის მსგავსად თამარი დაარქვეს. დატვირთული გრაფიკის მიუხედავად, დროის სიმცირე არ აფერხებდა ოჯახისთვის სათანადო ყურადღება დაეთმო და აქტიურად იღებდა მონაწილეობას შვილის აღზრდაში.

ქაქუცა ასევე იყო ოფიციალური წარმომადგენელი და გენერალური მენეჯერი კომპანია „Pragma Art Group inc”-ისა და ფესტივალების: „Riga Simphony USA”, “Slavianski Bazaar USA”,“ Pearl of Philadelphia”.

2019 წელს წარმატებით დაასრულა ბერკლის მუსიკალური კოლეჯის კურსი „Advanced Music Production”. კოვიდ -19 პანდემიის გამო შეჩერებული პროექტების მუხედავად, ქაქუცა კვლავ განაგრძობდა საყვარელ საქმიანობას და მიწვეული იყო საერთაშორისო ფესტივალების ჟიურის წევრად.

2020 წელს მოიპოვა სახელმწიფოს სრული დაფინანსება და ჩააბარა „ New York Film Academy”-ის უნივერსიტეტში ფოტოგრაფიის ფაკულტეტზე, თუმცა, სამწუხაროდ, ვერ დაასრულა. 2021 წლის 14 დეკემბერს ოცდაშვიდი წლის ასაკში ტრაგიკულ შემთხვევას ემსხვერპლა.


ქაქუცა კლდიაშვილი დაკავებული იყო ქველმოქმედებითი საქმიანობითაც. მისი შემოსავლის დიდი ნაწილი ხმარდებოდა როგორც ქართულ პროექტებს, ასევე ამერიკულს. მისი ოჯახი კვლავ განაგრძობს მის მიერ წამოწყებულ საქმეებს. ყოველწლიურად მუსიკალური ფესტივალებიდან გამოავლენს საუკეთესო მონაწილეს, რომელსაც დაენიშნება ქაქუცა კლდიაშვილის სახელობის სტიპენდია. ასევე დაწესდება მისი სახელობის ფოტო კონკურსიც.

ავტორი: ქეთი იმერლიშვილი
ექსკლუზიურად GOGA.TV-სთვის