ერთ თვიანი პაუზის შემდეგ დღეს პარლამენტში საშემოდგომო სესია გაიმართება. ერთ-ერთი მთავარი საკითხი ნიკა მელიასთვის პარლამენტის წევრის უფლებამოსილების ვადამდე ადრე შეწყვეტა იქნება.

პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძე მიიჩნევს, რომ მოცემულობის გათვალისწინებით, მგადაწყვეტილება არტივად მიიღება.

"პლენარულ სხდომაზე განიხილება ეს საკითხი და იქნება მსჯელობა, შესაბამისი კომიტეტის მიერ გაკეთდება მოხსენება ამასთან დაკავშირებით და წარიმართება დისკუსიაც და შემდგომ მიიღება გადაწყვეტილებაც იმ საკითხის ირგვლივ რამდენად უნდა შეუწყდეს უფლებამოსილება, თუ არ უნდა შეუწყდეს უფლებამოსილება ბატონ მელიას. ვფიქრობ, რომ კონტექსტისა და მთლიანად მოცემულობის გათვალისწინებით, საკმაოდ მარტივად მისაღები გადაწყვეტილებაა, რომელსაც კენჭისყრისთანავე გაიგებთ," - აცხადებს მიხეილ სარჯველაძე.

როგორც ენმ-ს ლიდერი ზაალ უდუმაშვილი აცხადებს, "ქართულ ოცნებას" აწყობს მელიასთვის უფლებამოსილების შეჩერება, რათა მის წინააღმდეგ ახალ-ახალი საქმეები დაიწყოს.

"გასაგებიც არის "ქართული ოცნების" ზრახვები. ახლა რაც შეიძლება უფრო სწრაფად უნდა დატოვონ ნიკა მელია იმუნიტეტის გარეშე, რათა შემდგომ უკვე კვლავ ჰქონდეს ბერკეტები "ქართულ ოცნებას", რომ კვლავ დაიწყოს ნიკა მელიას წინააღმდეგ ახალ-ახალი საქმეები.

თუ ვინმეს ჰგონია, რომ ნიკა მელიას უფლებამოსილების ან იმუნიტეტის შეწყვეტით ნიკა მელიას ბრძოლას შეაწყვეტინებენ, მე მგონი ამაში ეჭვი არავის არ ეპარება. ნიკა მელიამ ეს ერთხელ უკვე გაიარა და მზად არის კიდევ გაიაროს, ისევე როგორც ყველა თითოეული ჩვენთაგანი იმიტომ, რომ ჩვენ ძალიან დიდი ბრძოლა გვაქვს ბოლომდე მისაყვანი," - აცხადებს ზაალ უდუმაშვილი.

"ნაციონალური მოძრაობის" თავმჯდომარემ საკანონმდებლო ორგანოს მანდატის გაუქმების მოთხოვნით თავად მიმართა. მიზეზად ნიკა მელიამ 19 აპრილის შეთანხმებიდან "ქართული ოცნების" გასვლა დაასახელა.