ნიკა მელიას საქმესთან დაკავშირებით გენერალურ პროკურატურაში საგანგებო განცხადება გაკეთდა. როგორც პროკურორმა მიხეილ სადრაძემ განაცხადა, სასამართლო პროცესზე, რომელიც 16:00 საათზე უნდა დაიწყოს, სასამართლო განიხილავს "ერთიანი ნაციონალური მოძრაობის" თავმჯდომარის ნიკა მელიასთვის აღკვეთის ღონისძიების სახედ პატიმრობის შეფარდების შუამდგომლობას და თუ, სასამართლო გაიზიარებს მოთხოვნას, გადაწყვეტილების აღსრულება დაევალება შესაბამის სამსახურებს.

"ჩვენი სამართლებრივი მოთხოვნა არის დასაბუთებული და არგუმენტირებული, გვაქვს გონივრული მოლოდინი, რომ სასამართლო გაიზიარებს და დააკმაყოფილებს ჩვენს სამართლებრივ მოთხოვნას. რაც შეეხება არგუმენტაცია, ბრალდებულის ქმედებები კონფლიქტში მოდის კანონის დანაწესებთან, გირაოს არგადახდა და გირაოს პირობების შეუსრულებლობა, ასევე ტირაჟირება, რომ არ შეასრულებს სასამართლო გადაწყვეტილებას არის ფაქტობრივი მოცემულობა, რომ გამოყენებული იქნებს პატიმრობა. თუ სასამართლო გაიზიარებს ჩვენს მოთხოვნას გადაწყვეტილების აღსრულება დაევალება შესაბამის სამსახურებს,"- განაცხადა მიხეილ სადრაძემ.

შეგახსენებთ, პროკურატურის განცხადებით, "ერთიანი ნაციონალური მოძრაობის" თავმჯდომარე ნიკა მელიას გირაოს პირობების შეუსრულებლობის გამო მანამდე გამოყენებული აღკვეთის ღონისძიება გაუმკაცრდა და გირაოს ოდენობა გაიზარდა 40 000 ლარით. ბრალდების მხარე ნიკა მელიას 2019 წლის 20-21 ივნისის ღამეს ჯგუფური ძალადობის ხელმძღვანელობას და მასში მონაწილეობას ედავება. პროკურატურამ გირაოს გაზრდილი ოდენობის გადახდისთვის ნიკა მელიას ერთკვირიანი ვადა მისცა, რომელიც 12 თებერვალს ამოიწურა. პროკურატურის განმარტებით გირაოს თანხის გადაუხდელობის გამო ბრალდების მხარემ მიმართა სასამართლოს მის მიმართ შერჩეული აღკვეთის ღონისძიების პატიმრობით შეცვლის თაობაზე, ამისთვის პროკურატურას პარლამენტის თანხმობა და ნიკა მელიასთვის სადეპუტატო იმუნიტეტის მოხსნა სჭირდებოდა. პარლამენტმა 88 ხმით 2-ის წინააღმდეგ ნიკა მელიასთვის იმუნიტეტის შეჩერებას მხარი დაუჭირა.