ნიკა მელიას ადვოკატებს პარლამენტში კომიტეტის სხდომაზე დასწრება სურთ, რისთვისაც შესაბამისი საშვის დაშვებას მოითხოვენ იმისათვის. ენმ-ს თავმჯდომარის უფლებადამცველები პროკურორისათვის მწვავე კითხვები დასმას აპირებენ.

მმართველი გუნდის წევრი გურამ მაჭარაშვილი კი აცხადებს, რომ დეპუტატები კომიტეტზე სისხლის სამართლის საქმეს არ განიხილავენ და თუ ვინმეს სურვილი აქვს სხდომას დაესწროს, ეს თავმჯდომარესთან შეთანხმებით უნდა მოხდეს.

"ვიხილავთ მხოლოდ ფორმალურად იმ საკითხს, მოეხსნას თუ არა, იმუნიტეტი ნიკა მელიას იმისათვის, რომ ის გახდეს თანაბარი მოქალაქე. მხოლოდ ამის შემდეგ მოხდება პროკურატურის შუამდგომლობა სასამართლოს მიმართ აღკვეთის ღონისძიების შეცვლასთან დაკავშირებით. ნებისმიერ წარმომადგენელს, რომელსაც სურვილი აქვს დაესწროს კომიტეტის სხდომას, უნდა შეათანხმოს კომიტეტის თავმჯდომარესთან. ეს იმიტომ, რომ მიმდინარე საკითხთან, თუ არსებობს რაიმე კითხვა აქ მოხდეს ამის განხილვა. ამ კომიტეტზე არ ხდება სისხლის სამართლის საქმის განხილვა,"- განაცხადა პარლამენტის საპროცედურო საკითხთა და წესების კომიტეტის თავმჯდომარის პირველი მოადგილე გურამ მაჭარაშვილი.

პარლამენტს, სადაც დღეს ნიკა მელიასთვის სადეპუტატო იმუნიტეტის შეჩერების საკითხი უნდა განიხილონ, აქციის ფონზე მოუწევს საკითხზე მსჯელობა.

საკანონმდებლო ორგანოსთან შეკრებილები არიან "მოძრაობა საქართველოს" აქტივისტები. ისინი შეძახილებით აცილებენ დეპუტატებს. მათ პარლამენტთან სიმბოლურად მავთულხლართები აქვთ მიტანილი. ადგილზე მობილიზებულია სამართალდამცავთა ჯგუფი.

2019 წლის შემდეგ, ნიკა მელია უკვე მორედ დგას დაპატიმრების საფრთხის წინაშე. დღეს პარლამენტმა, პროკურატურის მიმართვის საფუძველზე, დეპუტატს ნიკა მელიასათვის იმუნიტეტის შეჩერებას კენჭი უნდა უყაროს.