"პრობლემები ურთიერთობაშიც ალაგდება და სხვა სფეროებშიც, გამოჩნდება ახალი სტაბილური ფულის წყარო" - ასტროლოგი ხათუნა ნოელი მომდევნო ერთ კვირაზე

ასტროლოგი ხათუნა ნოელი უახლოეს პერიოდში მოსალოდნელი ტენდენციების შესახებ წერს:

"1 თებერვალს ვენერა მერწყულის ზოდიაქოში გადავიდა. ამ კვირაში მას რამდენიმე მნიშვნელოვანი ასპექტი ექნება - 2 თებერვლიდან აქ მყოფ სატურნს შეუერთდება, 3 თებერვლიდან კი კუროში მოძრავ ურანთან გააკეთებს კვადრატურას. დაძაბული ასპექტებია, რა თქმა უნდა, და შესაბამის პრობლემებსაც მოიტანს, რაზედაც ქვევით ვისაუბრებ. აგრეთვე მათი დაძლევის გზებსაც გეტყვით. 5-ში ვენერა სატურნის შეერთებას იუპიტერთან შეერთებაც გააკეთილშობილებს და სახეს შეუცვლის (პიკი 12 თებერვალს). გარდა ამისა, 5 თებერვალსვე ნეგატიური ასპექტები თავიანთი ზემოქმედების მაქსიმუმს მიაღწევენ და შემდეგ თანდათან დაიშლებიან, თუმცა კვირის ბოლომდე ძალას მაინც ინარჩუნებენ.

ახლა უფრო კონკრეტულად:

ვენერა სატურნის შეერთებამ რომ ურთიერთობაში გაუცხოება და დისტანციურობა არ მოიტანოს, ან საზოგადოებიდან გარიყულად და დეპრესიულად არ იგრძნოთ თავი, სჯობს ნებაყოფლობით განმარტოვდეთ და საკუთარ გრძნობებს და სულიერ ფასეულობებს გადაავლოთ თვალი. თუ ვინმეს რაიმე ისეთი კოლექცია გაქვთ, რომელსაც თვალის ჩინივით უფრთხილდებით (მაგ., ძველი მონეტები), ახლაა მათი წესრიგში მოყვანის დრო. ასევე, შეგიძლიათ დაალაგოთ ძველი ნივთები და თან კარგად დაუკვირდეთ, ხომ არაა მათში რაიმე ისეთი, რაც ფაქტობრივად განძს უდრის? ზოგმა სოთბის აუქციონზე გასატან ეგზემპლარსაც კი შეიძლება გამოჰკრას ხელი... თუმცა ეს უფრო 5 რიცხვიდან იქნება მოსალოდნელი, როცა ამ წყვილს იუპიტერიც შეუერთდება.

რაც შეეხება სატურნისა და ვენერას კვადრატს, ის სინამდვილეში არც ისეთი საშიშია, როგორც ერთი შეხედვით ჩანს. იცით რატომ? იმიტომ, რომ ვენერა ახლა ურანის ტერიტორიაზეა, ურანი კი ვენერასი. სხვა ნიშნებში განლაგებულები ისინი გაცილებით უფრო ''ბოროტმოქმედნნი'' იქნებოდნენ. მაგრამ ახლა, ვიდრე ერთმანეთთან სტუმრად იმყოფებიან, ეცდებიან, ნაკლები გააფუჭონ, რომ მასპინძელმა, რომელიც თავის მხრივ, მათ სახლში სტუმრიანობს, არაფერი აურიოს იქ სამაგიეროს გადახდის მიზნით. თუმცა სიფრთხილეს თავი მაინც არ სტკივა.

და აი, რას ვითვალისწინებთ ჩვენ:

არა ვმფლანგველობთ (მოლებში არ გავრბივართ და ყველაფერს, რაც გვჭირდება და არ გვჭირდება, არ ვყიდულობთ.)
ტოტალიზატორებსაც და მსგავს დაწესებულებებსაც არ ვაკითხავთ.
ახალ რომანტიულ თავგადასავლებში არ ვეშვებით თავით.
მორალისა და საზოგადოებაში ქცევის ნორმებს არ უგულვებელვყოფთ.
ექსცენტრიული გამოხტომებისაგან თავს ვიკავებთ. სხვებისას - ვატარებთ.
პარტნიორის მოსაზრებებს და თხოვნებს ერთი ხელის მოსმით არ უარვყოფთ. ვუკვირდებით, იქნებ რამე რაციონალური და სასარგებლოც კი აღმოვაჩინოთ.
ამ ყველაფრის ნაცვლად, ვცდილობთ დავკავდეთ შემოქმედებითად. ვისაც ხატვა შეგიძლიათ - ხატეთ (ძერწეთ, ქსოვეთ, კერეთ, ) ბოლო-ბოლო სახლი მორთეთ, დეკორაციები გააახლეთ...

ვინც მოითმენს - ის მოიგებს: იუპიტერი და ვენერას შეერთება სატურნთან ერთად სტაბილურ ახალ ფინანსურ წყაროს მოიტანს, რაღაც საკითხები თავისით გადაიჭრება, პრობლემები ურთიერთობაშიც ალაგდება და სხვა სფეროებშიც. (რაში - ამას პირადი რუკა აჩვენებს.) მოკლედ, არც ისეთი ცუდი 7 დღე გველის წინ, როგორც ერთი შეხედვით შეიძლება მოგეჩვენოთ. სრულიადაც არა - პირიქით! მეც წინდახედულებას და წარმატებებს გისურვებთ".

წყარო: intermedia.ge
553
3 წლ, 1 თ წინ