დედაქალაქის მერმა, კახა კალაძემ მუნიციპალური ინსპექციის ხელმძღვანელის თანამდებობაზე კახაბერ გულედანის კანდიდატურა წარადგინა.

"მუნიციპალური ინსპექციის ხელმძღვანელის თანამდებობაზე მინდა, წარმოგიდგინოთ კახაბერ გულედანის კანდიდატურა, რომელიც რამდენიმე წლის წინ სამგორის რაიონის გამგებლის პოზიციას იკავებდა. შემდეგ გადავიდა კერძო სექტორში. თუმცა, დღეს გვაქვს შესაძლებლობა, რომ ის წარვადგინოთ მუნიციპალური ინსპექციის ხელმძღვანელის თანამდებობაზე.

მას ამ მიმართულებით მუშაობაში ძალიან დიდი გამოცდილება აქვს. საპასუხისმგებლო თანამდებობები ეკავა მთავრობის ადმინისტრაციაში, გარემოს და ბუნებრივი რესურსების დაცვის სამინისტროში, საქართველოს მეტროლოგიის ცენტრში. ასევე იყო რეგიონალური განვითარებისა და ინფრასტრუქტურის მინისტრის მოადგილე. დარწმუნებული ვარ, ამ მნიშვნელოვან, საპასუხისმგებლო თანამდებობას ღირსეულად გაართმევს თავს და ყველაფერს გააკეთებს, რათა ქალაქში წესრიგი იყოს," – განაცხადა კახა კალაძემ.