ოპოზიციაში ივერი მელაშვილისა და ნატალია ილიჩოვას გირაოთი გათავისუფლების საკითხს აფასებენ. მმართველი გუნდის ოპონენტების თქმით, პოლიტპატიმრების გათავისუფლება არის ბრძოლის დასაწყისი სამართლიანი სასამართლოს შესაქმნელად.

"ევროპული საქართველოს" წევრი გიგი წერეთელი მიიჩნევს, რომ ისინი პოლიტიკური მძევლები იყვნენ და მათთვის გირაოს შეფარდებაც არასწორი იყო.

"ნაციონალური მოძრაობის" წევრი, სალომე სამადაშვილი აცხადებს, რომ ამ საქმესთან დაკავშირებით საბოლოოდ მაშინ მიაღწევენ გამარჯვებას, როცა მათ წინააღმდეგ პოლიტიკური დევნა შეწყდება.

"თავიდანვე იკვეთებოდა, რომ იყო პოლიტიკური მდგენელი, არჩევნების წინ ხელისუფლების სურვილი, რომ შეეკრა საქმე წინა ხელისუფლების წინააღმდეგ. ძალიან მნიშვნელოვანია, რომ ისინი გათავისუფლდნენ გირაოთი, რაც შეცდომად მიმაჩნია, ძალიან დიდი უსამართლობაა. საბოლოოდ, ამ საქმესთან დაკავშირებით გამარჯვებას მივაღწევთ მაშინ, როდესაც შეწყდება ამ ორი, სრულიად უდანაშაულო ადამიანის წინააღმდეგ პოლიტიკური დევნა,"-განაცხადა სალომე სამადაშვილმა.

"ლელოს" ლიდერის, ანა ნაცვლიშვილის განცხადებით ეს საქმე არის კიდევ უფრო მეტი ენერგიის მომცემი მათთვის, რომ გაგრძელდეს ბრძოლა სამართლიანი სასამართლოს შესაქმნელად.

"გირჩის" ლიდერის, ზურაბ ჯაფარიძის შეფასებით, პოლიტიკური გადაწყვეტილების გარეშე პროკურატურა მათი გირაოს სანაცვლოდ გათავისუფლების შუამდგომლობას ვერ დააყენებდა.

"ეს არის პოლიტიკური გადაწყვეტილება. პოლიტიკური გადაწყვეტილების გარეშე შეუძლებელია პროკურატურას ეს მოეთხოვა. საბოლოო ჯამში, კარგია ის, რომ ის ადამიანები არიან გარეთ, თუმცა, ეს ჯერ კიდევ არ არის დასასრული, ეს ადამიანები არიან გასამართლებელი, პროცესია ბოლომდე მისაყვანი. თავისთავად ის, რომ ხელისუფლება იღებს გადაწყვეტილებას, რომ წინასაარჩევნოდ პოლიტიკური დივიდენდების მიღების მიზნით ორი სრულიად უდანაშაულო ადამიანი გამოკეტოს ციხეში, ეს აჩვენებს რა რეალობაში,"-განაცხადა ზურაბ ჯაფარიძემ

"სტრატეგია აღმაშენებლის" წევრი პაატა მანჯგალაძე აცხადებს, რომ მათი გათავისუფლება კარგია, თუმცა, ბრძოლა უნდა გაგრძელდეს იქამდე, სანამ მათ ბრალი არ მოეხსნებათ.

შეგახსენებთ, რომ თბილისის საქალაქო სასამართლომ უცხო ქვეყნისთვის საქართველოს ტერიტორიის ნაწილის გადაცემისკენ მიმართული მოქმედების განხორციელების ფაქტზე დაკავებულ ივერი მელაშვილსა და ნატალია ილიჩოვას აღკვეთის ღონისძიება - პატიმრობა გირაოთი შეუცვალა. მათ 20-20 ათასი ლარის გადახდა დაეკისრათ.