თავისუფლების სანაცვლოდ გირაო, სამსახურიდან გათავისუფლებით - 4 თვიანი პატიმრობის შემდეგ ივერი მელაშვილი და ნატალია ილიჩოვა სასამართლო დარბაზიდან გაათავისუფლეს. ივერი მელაშვილი მისი და მისი კოლეგის დაკავებას პოლიტიკურად აფასებს და ამბობს, რომ ეს საქმე წინასაარჩევნოდ შეიკერა. მელაშვილისთვის მიუღებელია მათი გათავისუფლების სანაცვლოდ რომელიმე ოპოზიციონერის საკანონმდებლო ორგანოში შესვლა.

"პოლიტიკურ მიზნებს ვარ გადაყოლილი. მთელი ეს ყბადაღებული პროცესი, მათ შორის, ჩემი და ნატალიას დაპატიმრებაც, თავისი შედეგიდან გამომდინარე, არის პოლიტიკური პროცესი; პირველი - წინასაარჩევნო პერიოდში პოლიტიკური ოპონენტის გაშავების და რაღაც ქულების დაგროვების მიზნით; მეორე - მიზანმიმართული ქმედება, რომ საქართველოს გაუფუჭდეს ურთიერთობა მის პარტნიორ ქვეყანასთან.

ჩემი გათავისუფლება რომ გახდეს მიზეზი, რომ ვინმე ამის გამო შევიდეს პარლამენტში, მე ნამდვილად არ მინდა ამისი ნაწილი ვიყო და არც ვაძლევ ჩემი მხრიდან უფლებას არავის, რომ გამომიყენოს. ამას მირჩევნია, უკან წავიდე და გავაგრძელო ციხეში ყოფნა,"-განაცხადა ივერი მელაშვილმა.

შეგახსენებთ, რომ თბილისის საქალაქო სასამართლომ უცხო ქვეყნისთვის საქართველოს ტერიტორიის ნაწილის გადაცემისკენ მიმართული მოქმედების განხორციელების ფაქტზე დაკავებულ ივერი მელაშვილსა და ნატალია ილიჩოვას აღკვეთის ღონისძიება - პატიმრობა გირაოთი შეუცვალა. მათ 20-20 ათასი ლარის გადახდა დაეკისრათ.