თბილისში მყოფი ამერიკის სახელმწიფო მდივანი ოფიციალურ შეხვედრებს დილიდან იწყებს. პირველი აუდიენცია მაიკ პომპეოს 9 საათისთვის საქართველოს პრეზიდენტთან აქვს. მოგვიანებით შედგება შეხვედრა პრემიერთან და საგარეო საქმეთა მინისტრთან.

დილის 11 საათისთვის ამერიკის პირველ დიპლომატს კი უკვე საპატრიარქოში ელოდებიან. ბოლო შეხვედრას პომპეო სასტუმრო შერატონში სამოქალაქო სექტორის წარმომადგენლებთან გამართავს.

მედიასთან კომუნიკაცია დაგეგმილი არ არის. ამერიკელი მაღალჩინოსანი საქართველოს შუადღის ორი საათისთვის დატოვებს.

მაიკ პომპეო თბილისში მეუღლესთან ერთად გუშინ, საღამოს 8 საათისთვის ჩამოფრინდა. ტრაპთან მას საგარეო საქმეთა მინისტრი და საქართველოსა და შეერთებული შტატების ელჩები დახვდნენ.