პარლამენტის დიდუბე-ჩუღურეთის მაჟორიტარი დეპუტატობის დამოუკიდებელი კანდიდატი ანა დოლიძე ცეკოს არჩევნების გაყალბებაში ადანაშაულებს. დიდუბე-ჩუღურეთის დამოუკიდებელი მაჟორიტარი დეპუტატობის კანდიდატი გვიან ღამით საარჩევნო ადმინისტრაციასთან მივიდა.

დოლიძე აცხადებს, რომ ცესკომ ხმები ხელახლა უნდა დაითვალოს.

"დიდუბე-ჩუღურეთი არის ერთ-ერთი კერა, სადაც გაყალბდა არჩევნები, ამ შენობაში მოთავსებულმა კუდიანებმა გააყალბეს არჩევნები. ნურავინ შეეცდება, ჩემი სახელი იქ ვიღაცასთან დატაკებითა და კინკლაობით, ამ პატარა თემასთან ტილაობაში ჩაითრიოს. ეს ორგანო უნდა გადადგეს და არჩევნები უნდა ჩატარდეს თავიდან. ეს არის უმთავრესი მოთხოვნა," - განაცხადა ანა დოლიძემ.

ცესკომ დიდუბე-ჩუღურეთის ოლქთან დაკავშირებით მონაცემები გუშინ შეცვალა.104-ვე საარჩევნო უბნის ხმების დათვლის შედეგად, 20,99 %-იანი მხარდაჭერით (14 438 ხმა) მეორე ადგილზე ოპოზიციონერი დამოუკიდებელი კანდიდატი, ანა დოლიძე იმყოფებოდა, რომელიც მხოლოდ 9 ხმით (14 429 ხმა, 20,97 % ) უსწრებდა გაერთიანებული ოპოზიციის საერთო კანდიდატ ზურაბ გირჩი ჯაფარიძეს, თუმცა რამდენიმე წუთის შემდეგ ცესკომ საიტზე მონაცემები შეცვალა, რითაც მეორე ადგილზე უკვე ზურაბ ჯაფარიძეა. ბოლო მონაცემებით, ჯაფარიძემ 21,09 % (14529 ხმა) მიიღო, ანა დოლიძემ კი 20,96 % (14438)ხმა.