ციანიდის საქმეზე მსჯავრდებულ მამა გიორგი მამალაძის ადვოკატის თქმით, მისი ჯანმრთელობის მდგომარეობა მძიმეა და ნევროლოგიურ კვლევებს საჭიროებს. უფლებადამცველი დეკანოზს სასჯელაღსრულების დაწესებულებაში დღეს მოინახულებს.

დღესვე უნდა გახდეს ცნობილი, რომელ კლინიკაში და როდის გადაიყვანენ გიორგი მამალაძეს გამოკვლევების ჩასატარებლად. ოჯახი მამალაძის "ნიუ ჰოსპიტალში" ტრანსპორტირებას ითხოვს. ჯანმრთელობის მდგომარეობის გაუარესების გამო, მამალაძეები მსჯავრდებულისთვის სასჯელის გადავადებას ითხოვდნენ.

"გიორგი მამალაძის ჯანმრთელობის მდგომარეობა კვლავ მძიმეა, ის პარალიზებულია. შევხვდები დეკანოზ მამალაძეს, ჩემი ინფორმაციით, დეკანოზ მამალაძეს სასჯელაღსრულების წარმომადგენელმა უთხრა, რომ მისთვის ნევროლოგიური კვლევის ჩატარება მოხდება სამოქალაქო პროფილის კლინიკაში, შესაბამისად, მას ამ კვლევის მიზნით, სავარაუდოდ, გაიყვანენ სასჯელაღსრულების დაწესებულებიდან,“ - განაცხადა "ადამიანის უფლებების სწავლებისა და მონიტორინგის ცენტრის სისხლის სამართლის ადვოკატმა" ქეთი ჩუთლაშვილმა.

შეგახსენებთ, დეკანოზ გიორგი მამალაძეს 9-წლიანი პატიმრობა 2017 წელს მიუსაჯეს. ის დამნაშავედ პატრიარქის მდივან–რეფერანტის მკვლელობის მცდელობაში ცნეს.