ძალადობისა და მუქარის ფაქტები, რომელიც "კურიერმა" ექსკლუზიურად გაარკვია - ახალგაზრდა ქალს პატრულ-ინსპექტორი რამდენიმე თვის განმავლობაში ფიზიკური და ფსიქოლოგიური ძალადობის გარდა, შვილის მოკვლითაც ემუქრებოდა. დაზარალებულს სამართალდამცველთან ერთწლიანი ურთიერთობა აკავშირებდა.

ქალმა პოლიციას დახმარების თხოვნით თითქმის 3 თვის წინ მიმართა, თუმცა მისი განცხადებით, სამართალდამცავი უწყებების მხრიდან ფაქტს რეაგირება არ მოყოლია და სავარაუდო მოძალადეც კვლავ იგივე თანამდებობაზე რჩება.

ქალმა "კურიერს" პოლიციელთან სოციალური ქსელის მიმოწერებიც გადასცა, სადაც ერთ-ერთი ეპიზოდი ცივი იარაღით დაზიანებასაც ეხება. დაზარალებული ქალი სამართალდამცავი ორგანოებისგან სწრაფ და ობიექტურ გამოძიებას ითხოვს. "კურიერი" სავარაუდო მსხვერპლის ვინაობას შეგნებულად არ ასაჯაროებს.

"იყო დანით მუქარა, ზიანიც მომაყენა ხელზე, იყო ბავშვის მოკვლის მუქარა, ინტიმური სურათების გავრცელების და ა.შ. ფსიქოლოგიური ძალადობაც იყო. 24 ივლისს ტელეფონით დამემუქრა, რომ საბოლოოდ სანამ არ გაგანადგურებ, არ გავჩერდებიო. წავედი და დავწერე განცხადება პოლიციაში. პროკურატურაში ამდენი ხანია ტელეფონი ჩამორთმეული მაქვს. პროკურატურაში მეუბნებიან, რომ ხვალ-ზეგ დაგირეკავთ, მაინც არაფერი. ისეთი ფაქტები მაქვს დადებული, სქრინებს რომ კითხულობდნენ, თავისთვის ერთმანეთში ამბობდნენ, რომ უეჭველი დაიჭერენ და ა.შ. არადა, ჩვეულებრივად აგრძელებს მუშაობას, დაჭერას თავი დავანებოთ. ადამიანი დასაჭერია, მაგრამ 4 თვეა ხელს არ კიდებენ, ეს ნიშნავს, რომ ესე იგი არ უნდათ დაჭერა," - ამბობს ახალგაზრდა ქალი.