კორონავირუსით ინფიცირებულთა რაოდენობის ზრდის მიუხედავად, სიტუაცია კონტროლს ექვემდებარება და ლეტალური შემთხვევებიც მინიმალურია - COVID-19-ის ბოლო მონაცემებზე "კურიერთან" თენგიზ ცერცვაძემ ისაუბრა.

ქვეყნის მთავარი ინფექციონისტის განცხადებით, ექიმები პაციენტებს შეუფერხებლად მკურნალობენ, დამატებით მობილიზებულია 3 ათასზე მეტი საწოლი.

ინფექციური საავადმყოფოს დირექტორი ინფიცირებულთა გამოჯანმრთელების მეთოდებზეც ამახვილებს ყურადღებას და ერთ-ერთ მნიშვნელოვან სამკურნალო საშუალებად კოვიდისგან გამოჯანმრთელებული პაციენტების სისხლის პლაზმას ასახელებს. ამიტომ, ის მოუწოდებს გამოჯანმრთელებულ პაციენტებს, გაიღონ სისხლი დაავადებულთათვის.

თენგიზ ცერცვაძე ამ ეტაპზე ქვეყანაში რაიმე სახის დამატებითი შეზღუდვების ამოქმედებას გამორიცხავს.

"ბოლო 2-3 კვირის მანძილზე საქართველოში აღინიშნება ახალი შემთხვევების საკმაოდ მნიშვნელოვანი მატება, რასაც თან სდევს გარდაცვლილთა რიცხვის მატებაც, მაგრამ საბედნიეროდ, მხოლოდ ერთეული. მინდა მოვუწოდო მოსახლეობას, ვისაც გადატანილი აქვს კოვიდი, გამოიჩინონ მოქალაქეობრივი პასუხისმგებლობა, მოიხადონ ვალი საზოგადოების წინაშე და მოვიდნენ ჩვენს ცენტრში, რათა ჩააბარონ თავიანთი სისხლი. ამით ისინი გადაარჩენენ სხვა კოვიდინფიცირებულების სიცოცხლეს," - განაცხადა თენგიზ ცერცვაძემ.