პოლიტიკური გაერთიანება "ლელო საქართველოსთვის" გლდანის მაჟორიტარი დეპუტატობის კანდიდატი, გლდანის რაიონში საგზაო ინფრასტრუქტურის პრობლემას ეხმიანება.

გიგლა მიქაუტაძე ქალაქის მერს კონკრეტულ საკითხებთან დაკავშირებით მიმართავს და მოუწოდებს პასუხი გასცეს რეაბილიტაციის და ტენდერებთან მიმართებაში არსებულ მნიშვნელოვან შეკითხვებს.

მისი თქმით, ტენდერის გარეშე საღებავების შეძენა "ქართული ოცნების" ბიუჯეტის შევსების მიზანს ემსახურება.

"ბატონო კალაძე, არ გირჩევთ გლდანელების მოთმინების გამოცდას. თბილისის მერია ტენდერის გარეშე აპირებს საღებავების შეძენას ქუჩების დასახაზად, მაშინ, როცა ამის საჭიროება არ არსებობდა სწორი დაგეგმვის პირობებში. როგორც ჩანს, "ქართული ოცნება" წინასაარჩევნო ყულაბის შევსებას საღებავების ფულითაც აპირებს.

წელიწადნახევარია, გლდანის რაიონის მაცხოვრებლები ვეკუას, ხიზანიშვილისა და უხოჭოს ტბის ქუჩების რეაბილიტაციის დასრულებას ელოდებიან.

გარდა ამისა, ხიზანიშვილის ქუჩა პირველივე წვიმის დროს დაზიანდა, კვლავ არ დაწყებულა ქუჩების დახაზვა და ისევ არ მუშაობს შუქნიშნები. ამის გამო ხშირია ავტოავარიები.

კატეგორიულად მოვითხოვ თბილისის მერისგან, დროულად დაასრულოს გლდანის პროექტი და მისცეს ხალხს ნორმალურად გადაადგილების საშუალება. ბატონო კალაძე, არჩევნების წინ მაინც იმუშავეთ ნორმალურად და ნუ გამოცდით გლდანის რაიონის მოსახლეობის მოთმინებას," - აცხადებს გიგლა მიქაუტაძე.