ფეხბურთელ გიორგი შაქარაშვილის საქმეზე დაკავებული პირების ნაწილს გლდანის სასჯელაღსრულების დაწესებულებაში ბრალი დაუზუსტდათ, ნაწილს კი დაუმძიმდათ.

ნარეკვავში მომხდარი დაპირისპირების კიბის ეპიზოდში მონაწილე საბა გოგშელიძის ადვოკატი არჩილ დეკანოზიშვილი ამბობს, რომ ისინი ბრალდებას არ ეთანხმებიან:

"დაუმძიმდა ბრალი ჩემი დაცვის ქვეშ მყოფს, 120-ე მუხლის მეორე ნაწილის "დ" ქვეპუნქტით. საქმის მასალებიდან ჩანს, რომ დაზარალებული არის ნ.ხ და ვახო ჩიქოვანი. საქმე ეხება კიბის ეპიზოდს. მივუთითეთ, რომ ამ ბრალდებას არ ვეთანხმებით და ჩემმა დაცვის ქვეშ მყოფმაც წერილობით განაცხადა რომ არ ეთანხმება," - განაცხადა არჩილ დეკანოზიშვილმა.

მოხდება ბრალის დაზუსტება "ტოიოტა ქამრის" მგზავრებთან მიმართებაშიც. საქმე ეხება გურამ ამირხანაშვილისთვის თავისუფლების უკანონო აღკვეთას. ბრალი დაზუსტდა შემდეგი სახით: დანაშაულის დაფარვის მიზნით წინასწარი შეცნობით თავისუფლების აღკვეთა.

"მოხდა ბრალის ფორმულირების დაზუსტება, ის ფორმულირება, რაც იყო 109-ე მუხლით გათვალისწინებული დანაშაულისათვის ბრალდების დადგენილებაში, იმის გადმოტანა მოხდა ამ საქმეშიც, ანუ მიესადაგა იმ ვერსიას რაც არის 109-ე მუხლში და დაემატა გარემოება, თითქოს ამ პირებმა თავისუფლება უკანონოდ აღუკვეთეს გური ამირხანაშვილს სხვა დანაშაულის დაფარვის მიზნით," - აცხადებს არჩილ გაგნიძის და ვასილ მახარაძის ადვოკატი ბექა ნემსიწვერიძე.