გიორგი შაქარაშვილის საქმეზე გამოძიებისთვის ცრუ ჩვენების მიცემის ბრალდებით დაკავებული, ვერონიკა არონიას პროცესი დღეს გაიმართება.

სასამართლო მისთვის აღმკვეთი ღონისძიების შეფარდების თაობაზე იმსჯელებს. იმ შემთხვევაში, თუ ბრალდების მხარე მისთვის პატიმრობას მოითხოვს, ადვოკატები 19 წლის გოგონას გირაოთი გათავისუფლების შუამდგომლობას დააყენებენ. უფლებადამცველის თქმით, არონია ბრალს აღიარებს და აცხადებს, რომ მისი დაცვის ქვეშ მყოფმა დანაშაული შეუგნებლად, გამოუცდელობის გამო, სენსაციური რეპორტაჟის მომზადების მიზნით გააკეთა.

"ჩემი დაცვის ქვეშ მყოფი დანაშაულს სრულიად აღიარებს და ინანიებს. მას რაიმე სხვა განზრახვა არ ჰქონია, იგი ეწეოდა ჟურნალისტურ საქმიანობას და მისი ასაკის გათვალისწინებით, შეიძლება ითქვას, რომ ბავშვურად გადაწყვიტა შეექმნა სენსაციური სიუჟეტი. თუკი ჩემი დაცვის ქვეშ მყოფს საპატიმრო შეეფარდა, ამას დაცვის ხმარე გაასაჩივრებს,"- აცხადებს ვერონიკა არონიას ადვოკატი ანა ჟღენტი.

დანაშაულის გათვალისწინებით ვერონიკა არონიას 3-დან 7-დ წლამდე თავისუფლების აღკვეთა ემუქრება.