ექსპერტების ჯგუფმა პასუხი გასცა პროკურატურის 6 კითხვას, რომელსაც საგამოძიებო უწყება შაქარაშვილის საქმესთან დაკავშირებით ელოდებოდა. ამ დასკვნის მიხედვით, გიორგი შაქარაშვილს ისეთი და იმ ხარისხის დაზიანებები ჰქონდა მიღებული, რომ დიდი ალბათობით ეს დაზიანებები გამოიწვევდა თავის ტვინის ტრავმას, ტვინის შერყევას, მას შესაძლოა დაეკარგა გონება, რაც მას შეუზღუდავდა მოძრაობის და გადაადგილების საშუალებას. ექსპერტების დასკვნასთან დაკავშირებით "დღის კურიერის" ეთერში დამოუკიდებელმა ექსპერტმა ალექსანდრე გეჯაძემ ისაუბრა, რომელიც ასევე მონაწილეობდა ექსპერტიზაში.

პროკურატურის 6 შეკითხვა მდგომარეობდა შემდეგში

1 -დაზიანებები ცალ-ცალკე და ერთობლიობაში გამოიწვევდა თუ არა ტრავმულ შოკს ან გამოიწვევდა, თუ არა მოძრაობის შეზღუდვას?

2-თავზე არსებული დაზიანებები გამოიწვევდა თუ არა გონების დაკარგვას ან შეუზღუდავდა თუ არა მოძრაობას?

3-რას ნიშნავს – დაზიანებები განვითარებულია სიკვდილამდე ახლო პერიოდში? – ანუ, რას მოიცავს სიკვდილამდე ახლო პერიოდი?

4- წყალში აღმოჩენისა და ასფიქსიის დაწყების მომენტში, გიორგი შაქარაშვილი იყო გონებადაკარგული თუ ფიზიოლოგიურად აქტიურ მდგომარეობაში?

5-გვამზე არსებული ნიშნებისა და სეზონის გათვალისწინებით (ივნისი), რა პერიოდის განმავლობაში იმყოფებოდა გიორგი შაქარაშვილის გვამი წყალში?

6-რით შეიძლება აიხსნას გვამური ლაქების განსხვავებული ფერი გიორგი შაქარაშვილის ზურგზე და გულმკერდის არეში?

ალექსანდრე გეჯაძის თქმით, ყველა კითხვაზე არის გაცემული ამომწურავი და კონკრეტული პასუხი.

"მაღალი ალბათობით გამართლდა ჩემი პოზიციებიც, რასაც მე ვამბობდი, რომ ქალა-ტვინის დახურულ ტრავმას მაღალი ალბათობით, მხოლოდ თავის ტვინის შერყევის სახით ადგილი უნდა ჰქონოდა, ამას ადასტურებს ჩვენთან ერთად მოწვეული ნეირო-ქირურგები, ნევროლოგები და ა.შ. შესაბამისად გამართლდა ის პოზიციაც, რომ თავის ტვინის შერყევას ხშირად ახასიათებს გონების კარგვის ეპიზოდი, რომელიც შეიძლება მერყეობდეს რამდენიმე წამიდან რამდენიმე წუთამდე, არაუმეტეს 5 წუთისა. შესაბამისად ამ პერიოდისთვის შაქარაშვილს შეზღუდული ექნებოდა გადაადგილების და მოძრაობის უნარი, ამავდროულად დადგინდა ცალსახად და კატეგორიულად და მოიხსნა კითხვის ნიშნები, რომ დაზიანებები ხანდაზმულობით განვითარებული უნდა ყოფილიყო სიკვდილამდე დროის ახლო პერიოდში,"- განაცხადა გეჯაძემ.

ექსპერტის თქმით, ვერავინ ვერ დაადგენს წყალში მოხვედრის დროს შაქარაშვილს გონება ჰქონდა დაკარგული თუ არა. ამის დადგენის მეთოდიკა არ არსებობს.

"ჩვენ ვამბობთ, რომ შაქარაშვილს მაღალი ალბათობით ტვინის შერყევა უნდა ჰქონოდა, რეალურად ადგილი უნდა ჰქონოდა გონების დაკარგვის ეპიზოდსაც. რაც შეეხება სითხეში მოხვედრის დროს, გონება დაკარგულიც რომ არ ჰქონოდა, მას ექნებოდა ტკივილის სინდრომი, შინაგანი სისხლჩაქცევებიდან გამომდინარე, გონებადაკარგული რომ არც ყოფილიყო ესეც შეუზღუდავდა გადაადგილების და მოძრაობის უნარს, რომ გამოსულიყო წყლიდან," - აღნიშნა ალექსანდრე გეჯაძემ.

ექსპერტის განმარტებით, გადააგდეს თუ თავად აღმოჩნდა წყალში ამის დადგენა არ შედის სასამართლო-სამედიცინო ექსპერტის კომპეტენციაში:

"მე ვერ ვიმსჯელებ ჩემი მანდატის ფარგლების გარეთ და ვერ შევიჭრები თეორიულ მსჯელობაში. ეს ყველაფერი არის გამოძიების პრეროგატივა," - განაცხადა ალექსანდრე გეჯაძემ. ის ასევე ამბობს იმასაც, რომ პასუხი გაეცა მოსაზრებას იმის შესახებ, რომ შაქარაშვილი შესაძლოა გარდაცვალებიდან გარკვეული პერიოდის გასვლის შემდეგ აღმოჩნდა წყალში.

"ცალსახად დადგინდა ჩვენი ექსპერტთა კომისიის ერთობლივი მსჯელობის საფუძველზე, რომ შაქარაშვილის ცხედარი წყალში იმყოფებოდა 3-4 დღის ინტერვალში და ყველანაირ საფუძველს მოკლებულია საუბარი იმაზე, რომ მას ჰქონდა ქალა-ტვინის ტრავმა, უგონოდ იყო დღენახევრის განმავლობაში და შემდეგ მოახვედრეს წყალში. გვამური ლაქების განსხვავებული ფერი განპირობებულია ლპობითი პროცესების არსებობით. გვამური ლაქები შაქარაშვილის ცხედარს ცალსახად აღენიშნებოდა სხეულის წინა ზედაპირზე, რაც შეეხება სხეულის უკანა ზედაპირზე, არანაირი გვამური ლაქა იქ არ აღენიშნებოდა. შესაბამისად ე.წ ინფორმაცია, რომ გვამის გადაადგილებას ჰქონდა ადგილი, ყოველგვარ საფუძველს მოკლებულია," - განაცხადა ალექსანდრე გეჯაძე. მისი თქმით, ამ დრომდე არსებულ კითხვებზე ექსპერტიზის მიერ კონკრეტული ცალსახა პასუხებია გაცემული.

19 წლის ფეხბურთელი გიორგი შაქარაშვილი 18-19 ივნისის ღამით გაუჩინარდა ოთხდღიანი ძებნის შემდეგ, 22 ივნისს, მისი ცხედარი არაგვში იპოვეს.

ოფიციალური ინფორმაციით, გიორგი შაქარაშვილის საქმეზე 17 პირია დაკავებული 5 მათგანის წინააღმდეგ საქმე დამამძიმებელ გარემოებებში განზრახ მკვლელობისთვისაა აღძრული, ნაწილს კი გამოძიება ჯგუფური ძალადობას, ჯგუფური ძალადობის ორგანიზების და ამავე ძალადობაში მონაწილეობას, ასევე, ჯგუფურად თავისუფლების უკანონო აღკვეთას ედავება.