გიორგი შაქარაშვილის მკვლელობაში ბრალდებული არასრულწლოვნების პროცესი 4 საათია მიმდინარეობს. დღეს მცხეთის რაიონულ სასამართლოში პროცესი არასრულწლოვანი მოწმის ე.ხ-ს დაკითხვით გაგრძელდება.

რევაზიშვილის თანამესაკნის ჩვენების შემდეგ აქტუალური გახდა გიორგი შაქარაშვილის ჩანთის თემაც, რომელიც ბეტონის ჯებირზეა ნაპოვნი. ჩვენების მიხედვით, ჩანთას ბრალდებული ა.ქ. შეეხო. ადვოკატები კი ამბობენ, რომ დნმ-ს ანალიზი ამ ვერსიას არ ადასტურებს.

"ჩანთაზე არცერთი ბრალდებულის გენეტიკური პროფილი გამოვლენილი არ არის. მასზე აღმოჩნდა ორი პროფილი, რომელიც რომელიც ეკუთვნის გარდაცვლილ შაქარაშვილს და უცხო პირის, რომელიც საქმის მასალებში არ ფიგურირებს და ინდენტიფიცირებული არ არის, რომ შედარებოდა. ჩვენ გვგონია, რომ ჩანთის დადება განხორციელდა, ან საგამოძიებო ორგანოს თანამშრომლებმა არ დაიცვეს ის წესი, რომელსაც კანონი ავალდებულებს,"-ახცადებს არჩილ გაგნიძის ადვოკატი ვასილ მამულაშვილი.

საქმის პროკურორის განცხადებით, შუალედური დასკვნა ორი კვირის წინ მოვიდა და გიორგი შაქარაშვილის ჩანთაზე 4 პირის გენეტიკური კვალია აღმოჩენილი. ბრალდების მხარის ინფორმაციით, ერთი ნამდვილად გიორგი შაქარაშვილს ეკუთვნის, მეორე ჩანთის მეპატრონეს, მესამე შესაძლოა შაქარაშვილის ახლო ნათესავს ეკუთვნოდეს, ხოლო მეოთხე გენეტიკური ნიმუში დასადგენია ვის ეკუთვნის. ამავდროულად, პროკურორი ამბობს, რომ 17 ბრალდებულიდან ის არცერთ პირს არ ეკუთვნის, თუმცა ეს მათ ბრალეულობას არ აბათილებს.

"ჩანთაზე აღებული ბიოლოგიური მასალა შედარდა როგორც მკვლელობაში, აგრეთვე თავდასხმაში ბრალდებულებს და იმ პირებს, ვინც დაზარალებულები წაიყვანეს შემთხვევის ადგილიდან. მათ შორის ნიკა ჟვანიას პროფილიც შედარებულია და მისი პროფილიც არ აღმოჩნდა. რა თქმა უნდა, დაიკითხება ექსპერტიც და გაირკვევა, რა შემთვევაში რჩება, ან იშლება პროფილი ჩანთიდან. აგრეთვე, მეთევზეებს, ვინც იმ ადგილზე თევზაობს, ექსპერტიზა მათაც უტარდებათ,"-აცხადებს გიორგი შაქარაშვილის საქმის პროკურორი დავით ყაზარაშვილი.