სლოტ-კლუბ Lion-ის ყოფილი თანამშრომლები დირექციას უპირისპირდებიან. 50 ადამიანი საკუთარ ხელფასს, კომპენსაციას და იმის ოფიციალურ აღიარებას ითხოვს, რომ ისინი სამორინეში ნამდვილად მუშაობდნენ. მათი ინფორმაციით, სლოტ-კლუბს თანამშრომლების უმრავლესობა ოფიციალურად არ ჰყავდა გაფორმებული, რის შესახებაც მათ არ იცოდნენ; შესაბამისად, მათ ვერც სახელმწიფო კომპენსაციის მიღება შეძლეს.

"დაგვხურეს ისე, რომ არ გაგვაფრთხილეს. პერსონალის 90% სამსახურიდან მოგვხსნეს ​გაუფრთხილებლად, არ მოგვცეს ხელფასი და კომპენსაცია. ცნობები არ მოგვცეს, რომ 1200 ლარიანი ან 300 ლარიანი დახმარება მაინც აგვეღო. მოკლედ, ასე უსამართლოდ გვექცევიან,"- აცხადებს სლოტ-კლუბის ერთ-ერთი ყოფილი თანამშრომელი გიორგი მოდებაძე.

ხელმძღვანელობის უარის შემდეგ ყოფილმა თანამშრომლებმა სასამართლოს მიმართეს; შესაბამისი განცხადება შეტანილია ფინანსურ პოლიციაშიც. მათი თქმით, კაზინო უკვე რამდენიმე თვეა დახურულია, მისი ადმინისტრაცია კი სახელმწფოს მხრიდან დახმარების ასაღებად აუცილებელი საბუთის გაცემაზე უარს ამბობს.

სლოტ-კლუბის ხელმძღვანელობა ამჟამად ერევანში იმყოფება. "კურიერი" მათ დაუკავშირდა, თუმცა კლუბის წარმომადგენლებმა კომენტარისგან თავი შეიკავეს