საპროტესტო აქციაზე დაკავებულების სასამართლო პროცესი ბათუმში დასრულებულია. საქალაქო სასამართლოს მოსამართლემ 26 მოქალაქეს 1000-ლარიანი ჯარიმა დააკისრა, ერთ არასრულწლოვანსა და აქციის კიდევ ერთ მონაწილეს სიტყვიერი გაფრთხილება მიეცათ, ორი მათგანის საქმის განხილვა კი გადაიდო.

აქციის მონაწილეები ამბობენ, რომ პროცესზე სამართალდამცავებმა მათ წინააღმდეგ საკმარისი მტკიცებულებები ვერ წარადგინეს, თუმცა, სასამართლომ ისინი მაინც დააჯარიმა.

ერთ-ერთი დაკავებულის ძმა ამბობს, რომ ჯარიმას ოჯახი მაინც გაასაჩივრებს. ფირუზ წულუკიძე პოლიტიკურ მოტივებზე საუბრობს და ამბობს, რომ მისი ოჯახი ყველაფერს გააკეთებს იმისთვის, რომ „ოცნების“ მმართველობა მალე დასრულდეს.

დაკავებულები კიდევ ერთხელ საუბრობენ იმაზე, რომ სამართალდამცავებმა შეურაცხყოფა მათ რელიგიური ნიშნით მიაყენეს.

აგრესიულად განწყობილი პოლიციელი ჩემს შვილს ურტყამს და ეუბნება, რომ შენი ვაჰაბისტი დედაც, რელიგიას ეხება ეს კაცი. მე მივმართავ მთავრობას და ძალოვან სტრუქტურას, რომ ეს ადამიანი თანამდებობიდან გაათავისუფლონ, რომ მას არ მოჰყვება არც შემწყნარებლობა, არც რამ. ვიბრძოლებთ სამართლებრივად და ჩავრევთ ამ სიტუაციაში ყველა ორგანიზაციას და ყველა ადამიანთან მივა ის, რომ ეს არის რელიგიური დისკრიმინაცია, - ამბობს აქციის ერთ-ერთი მონაწილე.

საპროტესტო აქციის კიდევ ერთი მონაწილე ამბობს, რომ დაკავების შემდეგ, განყოფილებაში მისვლამდე სამართალდამცავები მას ფიზიკურად გაუსწორდნენ.

განყოფილებაში მისვლამდე მირტყამდნენ, ყველანაირად მისწორდებოდნენ, მაგინებდნენ, ყველანაირი შეურაცხყოფა მომაყენეს, არაადამიანურად მექცეოდნენ, - აღნიშნა აქციის მონაწილემ.

მოქალაქეები ამბობენ, რომ მოსამართლის მიერ მათი დაჯარიმება, მხოლოდ და მხოლოდ, აქციის მონაწილეების დაშინებას ემსახურება.

აქციის მონაწილეები უახლოეს დღეებში ფართომასშტაბიან აქციას აანონსებენ. მათი მოთხოვნა უცვლელია - გათავისუფლენენ დაკავებული სპორტსმენები.



ავტორი: თეა ვაშალომიძე.