მუნიციპალური ტრანსპორტი ხვალიდან მუშაობას აახლებს. შეზღუდვების გაუქმების მიუხედავად, მთავარ რეკომენდაციად რჩება დისტანციის დაცვა და პირბადეების ტარება.

დაავადებათა კონტროლის ეროვნული ცენტრის ხელმძღვანელი ამირან გამყრელიძე ამბობს, რომ მოსახლეობას დამშვიდების საფუძველი არ აქვს და მოქალაქეებმა ჰიგიენის ნორმები აუცილებლად უნდა დაიცვან.

ჩვენ დამშვიდების საფუძველი არ გვაქვს, იმიტომ, რომ ჩვენს ირგვლივ, ყველა ქვეყანაში, ვისაც უშუალოდ ვესაზღვრებით ან გვაქვს ტრადიციული, საქმიანი კავშირები, იქნება ეს ირანი, ბელორუსია, უკრაინა და ჩვენი უშუალო მეზობლები, რუსეთი, აზერბაიჯანი, თურქეთი თუ სომხეთი, ყველგან სიტუაცია არის დაძაბული, გაიხსნება საქალაქო ტრანსპორტი, აუცილებელია, რომ ყველამ ვიხმაროთ პირბადე. აუცილებელია თავი ავარიდოთ დიდ თავშეყრის ადგილებს. პირადი და საზოგადოებრივი ჰიგიენა კიდევ მეტად გავაუმჯობესოთ, - ამბობს ამირან გამყრელიძე.

საზოგადოებრივი ტრანსპორტის ამუშავების შემდეგ ეტაპობრივად მოიხსნება სხვა შეზღუდვებიც. პირველი ივნისიდან ღია და დახურული ტიპის ბაზრობები, მოლები და ღია ტიპის რესტორნები გაიხსნება, რვა ივნისიდან ამუშავდება დახურული რესტორნები და ის სასტუმროები, რომლებიც შესაბამისი შემოწმების შემდეგ მიიღებენ ნებართვას.

რვა ივნისიდან აღდგება საქალაქთაშორისო მგზავრობაც. 15 ივნისიდან დაშვებულია შიდა ტურიზმი, პირველი ივლისიდან კი საქართველო ე.წ. მწვანე ზონის ქვეყნებიდან უცხოელ ტურისტებს ელოდება