შეცვლის თუ არა სასამართლო ბრალდებულ გიორგი რურუას მიმართ შეფარდებულ აღმკვეთის ღონისძიებას, ეს დღევანდელ პროცესზე გახდება ცნობილი.

პროცესი ბრალდების მხარის მოწმეების დაკითხვით განახლდება.

სასამართლო სხდომაზე გიორგი რურუას ადვოკატები მისი აღმკვეთის ღონისძიების გარეშე დატოვების შუამდგომლობას დააყენებენ.

"ჩვენ ვაპირებთ, რომ მოვითხოვოთ გიორგი რურუასთვის შეფარდებული პატიმრობის გაუქმება და შესაბამისად, მისი გათავისუფლება. ვნახოთ, რა გადაწყვეტილებას მიიღებს სასამართლო.

გიორგი რურუას საქმე თავიდან ბოლომდე არის პოლიტიკური საქმე. ის სამართლებრივი გარემოებების გამო არ იმყოფება ციხეში და შესაბამისად, რა გადაწყვეტილება იქნება მიღებული რთულია პროგნოზის გაკეთება," - განაცხადა გიორგი რურუას ადვოკატმა დიმიტრი საძაგლიშვილმა.

გიორგი რურუა სამართალდამცველებმა 18 ნოემბერს ცეცხლსასროლი იარაღის მართლსაწინააღმდეგო შეძენა-შენახვა-ტარების მუხლით დააკავეს.