საპატრულო პოლიციის ყოფილმა ხელმძღვანელმა დავით ცინარიძემ, რომელსაც სასამართლომ დღეს პატიმრობა შეუფარდა, პროცესზე განცხადება გააკეთა. მან დაახლოებით 20 წუთი ისაუბრა, სადაც უმეტესი დრო მის კარიერული მიღწევების ჩამოთვლას დაუთმო. ცინარიძემ პროცესზე აღნიშნა, რომ ძალადობა, მისი სამსახურეობრივი სტატუსის მიუხედავად, არასოდეს გამოუყენებია.

რაც შეეხება ბრალდებას, ის მეუღლესთან კონფლიქტს ადასტურებს, თუმცა ასევე აღნიშნავს, რომ მისი მეუღლე ცდილობდა საპატრულო პოლიციაში დარეკვას, ცინარიძეს კი, როგორც თავად ამბობს, ეს არ სურდა და ამის გამო დაიწყო მათ შორის ფიზიკური დაპირისპირება, რომლის დროსაც ცეცხლსასროლი იარაღი გაუვარდა.

რაც შეეხება სახელმწიფო ბრალდებას, პროკურატურის განცხადებით, ამ საქმეში ყოფილი მაღალჩინოსნის წინააღმდეგ არაერთი ჩვენება და მტკიცებულება არსებობს.

დავით ცინარიძის ადვოკატი კი, სასამართლოს გადაწყვეტილებას დაუსაბუთებელს და უსამართლოს უწოდებს.

"სასამართლო სხდომის გადაწყვეტილება ბატონი დავითის მიმართ ყველაზე მკაცრი აღკვეთის ღონისძიების შერჩევის შესახებ, არის აბსოლუტურად დაუსაბუთებელი, უსამართლო და კანონის შეუსაბამო. გადაწყვეტილება უფრო მეტად დავით ცინარიძის დასჯისკენ იყო მიმართული. მოგეხსენებათ დავით ცინარიძეს მაღალი თანამდებობა ეკავა და იმის გამო, რომ არ გახდეს ეს სპეკულაციის საშუალება და არ ითქვას, რომ მაღალი თანამდებობის პირების მიმართ არ ხდება ყველაზე მკაცრი რეაგირება - გადაწყდა ასე,"- განაცხადა დავით ცინარიძის ადვოკატმა კახა ხვისტანმა.

შეგახსენებთ, მეუღლის მიმართ ძალადობის ბრალდებით დაკავებულ დავით ცინარიძეს წინასწარი პატიმრობა შეეფარდა.