პანდემიის პირობებში საქართველოს მოქალაქეების დაბრუნების პროცესი გრძელდება. დღეს მადრიდიდან სამშობლოში 180 ადამიანი ჩამოვა. საგანგებოდ ამისთვის საქართველოს ავიახაზების თვითმფრინავი ესპანეთის მიმართულებით რამდენიმე წუთში გაფრინდება.

საგანგებო რეისები საქართველოს მოქალაქეების ქვეყანაში დასაბრუნებლად კვირაში თითქმის სამჯერ სრულდება. მთავრობის ხელშეწყობით დაგეგმილი რეისების, სახმელეთო და საზღვაო გზებით, ქვეყანაში ორგანიზებულად დაბრუნდა 8 ათასზე მეტი პირი.

"სრულდება რეისი მადრიდიდან, რომლითაც საქართველოში დაბრუნდება 180 მგზავრი, მათ შორის ბორტზე იმყოფებიან ტრანზიტული მგზავრები, ლათინური ამერიკიდან, კერძოდ ჩვენი საელჩოების დახმარებით მოხერხდა ურუგვაიში ჩარჩენილი საქართველოს მოქალაქეების გამოყვანა, ასევე რეისით ისარგებლებენ განსაკუთრებული საჭიროების პირები, ქრონიკული დაავადების მქონე მოქალაქეები, ფეხმძიმე ქალები, სტუდენტები და ესპანეთის სამეფოში პანდეემის გავრცელების გამო თავშესაფრის გარეშე დარჩენილი მოქალაქეები,“ - აცხადებს საქართველოს საგარეო საქმეთა სამინისტროს ოფიციალური წარმომადგენელი, ვლადიმერ კონსტანტინიდი.