თეთრიწყაროს საავადმყოფოში კარანტინი გამოცხადდა - საუბარია იმ სამედიცინო დაწესებულებაზე, რომლის 41 წლის თანამშრომელსაც კოვიდინფექცია დაუდასტურდა.

ექთნის დაინფიცირების წყარო ჯერჯერობით ბუნდოვანი და გაურკვეველია.

ამ დროისთვის თეთრიწყაროში სრულად დადასტურებულია კორონავირუსის 19 ფაქტი. ამის გამო რამდენიმე საათია, რაც მუნიციპალური ცენტრი ჩაიკეტა. ქვემო ქართლში ეს უკვე მესამე ადმინისტრაციული ერთეულია. შეზღუდვა არ ვრცელდება სოფლებზე, სადაც ჯერჯერობით ვითარება კონტროლს ექვემდებარება.

"გუშინ ყველა ადამიანი, სანამ ჩაუტარდებოდათ ტესტირება თვითიზოლაციაში იყო გადაყვანილი. დაახლოებითი კავშირები, რაც პირველ ეტაპზე გამოაშკარავდა, 50 ადამიანი მოვათავსეთ სახლში, თვითიზოლაციაში, სანამ ტესტებამდე მივიდოდა საქმე," - განაცხადა თეთრიწყაროს მუნიციპალიტეტის მერმა გიორგი ქორიძემ.