კორონავირუსის საფრთხე იყო მთავარი თემა მთავრობის ადმინისტრაციაში, პრემიერთან გამართულ შეხვედრაზე, რომელსაც ჯანდაცვის ექსპერტები და ინფექციონისტები ესწრებოდნენ.

ჯანდაცვის საერთაშორისო ფონდ "კურაციოს" ერთ-ერთი დამფუძნებელი და მკვლევარი აკაკი ზოიძე აცხადებს, რომ შეხვედრაზე ყველა შესაძლო სცენარი განიხილეს და კონკრეტულ შეთანხმებასაც მიაღწიეს.

"ვისაუბრეთ რა სცენარები შესაძლოა განვითარდეს ყველაზე მძიმე და ყველაზე სასიკეთო შემთხვევაში. ვმსჯელობთ რა ზომებია მისაღები. ნაყოფიერი შეხვედრა იყო და მივაღწიეთ კონკრეტულ შეთანხმებას. ვისაუბრეთ ტესტირებაზე, როგორ უნდა მოხდეს და რა ჯგუფებს უნდა ჩაუტარდეთ. ტესტირება არ არის პანაცეა, ეს კარგად უნდა გვესმოდეს. მთავარი მომენტი, რაც გვაქვს ეს არის იზოლირება, დისტანცირება და სოციალური სოლიდარობა. ჩავთვალოთ, რომ ყველა ვართ რისკის ქვეშ და ყველა უნდა ვიყოთ იზოლაციაში და კარანტინში, სწორედ ეს არის ტესტირების მთავარი არსი. მთავარ იარაღად რჩება იზოლაცია და რეკომენდაციების შესრულება," - განაცხადა აკაკი ზოიძემ.