პრემიერთან გამართული შეხვედრის შემდეგ, სადაც გიორგი გახარიამ რეგიონებში ადგილობრივი ხელისუფლების წარმომადგენლებს უწყებათაშორისი საბჭოს რეკომენდაციების აღსრულება დაავალა, სახელმწიფო რწმუნებულებმა მედიასთან კომენტარები გააკეთეს​.

მათი თქმით, საკოორდინაციო საბჭოს მიერ გაცემული დავალებებისა და რეკომენდაციების შესასრულებლად მზად არიან, რათა კორონავირუსის გავრცელებას ხელი მაქსიმალურად შეუშალონ.

"ჩვენ მაქსიმალურად კოორდინირებულად ვმუშაობთ შესაბამის სამსახურებთან, საზოგადოებრივი ჯანდაცვის, ასევე დაავადებათა კონტროლის წარმომადგენლებთან, რათა მოხდეს ყველა პრევენციული ღონისძიების დროულად გატარება და ყველა ნაბიჯის დროულად გადადგმა, რომელიც ცენტრალური ხელისუფლების მიერ იქნება მიღებული," - განაცხადა შიდა ქართლის სახელმწიფო რწმუნებულმა, გიორგი ხოჯევანიშვილმა.

კახეთის სახელმწიფო რწმუნებული, ირაკლი ქადაგიშვილი აცხადებს, რომ რეგიონში უწყებათაშორისი საბჭოს რეკომენდაციებს სრულად დაიცავენ. მისი თქმით, აიკრძალება სამარშუტო ტაქსების მოძრაობა, ასევე დაიხურება რესტორნები და კაფე-ბარები.