მეორე გამოჯანმრთელებული ინფიცირებული საქართველოში. კორონავირუსით დაინფიცირებული პაციენტი ნომერი ორი, რომელიც ინფექციურში მკურნალობდა და რომლის ისტორიაც ირანს უკავშირდება, პირველადი ტესტით ჯანმრთელია.

ექიმების ინფორმაციით, თუ 24 საათში გაკეთებული მეორე ანალიზიც ნეგატიურ შედეგს აჩვენებს, პაციენტი ოფიციალურად განკურნებულად გამოცხადდება.

ახლა თბილისის ინფექციურ საავადმყოფოში 46 ადამიანი მკურნალობს, ლაბორატორიულად დადასტურებული შემთხვევების რაოდენობა ისევ 30-ია. სპეციალისტები ლუგარის ცენტრიდან 6 პაციენტის ანალიზს ელოდებიან.

"მეორე პაციენტთან, რომელსაც აქვს ირანის მოგზაურობის ისტორია, მეთხუთმეტე დღეზე, გუშინ ჩატარდა ტესტირება და პირველადად უარყოფითი პასუხია მიღებული. პირველადი უარყოფითი პასუხი ძალიან კარგია, თუმცა 24 საათის ინტერვალში უნდა გაკეთდეს ტესტირება და განმეორებით უარყოფითი პასუხის მიღების შემთხვევაში ვიტყვით, რომ გამოჯანმრთელდა," - განაცხადა მარინა ეზუგბაიამ.