პოლიტიკური შეთანხმება, რომლის ერთი ჩანაწერი მოლაპარაკებებში მონაწილე მხარეებისთვის ბუნდოვანია - რა შედეგი ექნება ხელისუფლებასა და ოპოზიციას შორის გუშინდელ კონსენსუსს იმ სისხლის სამართლის საქმეებზე, რომლებშიც კონკრეტული პოლიტიკოსები ფიგურირებენ. გათავისუფლდებიან თუ არა პოლიტპატიმრები, რომელთა არსებობას ქვეყანაში ხელისუფლება არ ადასტურებს - ეს არის მთავარი კითხვა, რომელზე პასუხიც, ოთხთვიანი შეხვედრების შედეგის შემდეგაც, ბუნდოვანია. მიღწეული შეთანხმების შემდეგ ოპოზიცია დღეს დამოუკიდებლად პირველად შეიკრიბა.

შეხვედრა დაახლოებით ნახევარი საათია, მიმდინარეობს. ეს პირველი შეხვედრაა მას შემდეგ, რაც შეთანხმება შედგა მმართველ გუნდსა და ოპოზიციას შორის. შეხვედრის დაწყებამდე მედიასთან განმარტება ოპოზიციური ლიდერების უმრავლესობამ გააკეთა.

ერთ-ერთი მთავარი საკითხი, რაზეც განსაკუთრებით ბევრი შეკითხვა დაისვა და რაზეც განსაკუთრებით ხაზგასმით საუბრობენ ოპოზიციური ლიდერები, მეორე შეთანხმებას შეეხება, სადაც საუბარია მართლმსაჯულების სისტემისა და სტანდარტების დახვეწაზე.