კორონავირუსის გავრცელება მსოფლიოს ეკონომიკას საფრთხეს ყოველდღიურად უქმნის. მას შემდეგ, რაც რეგიონსა და ქვეყანაში ვირუსის ფაქტები დადასტურდა, გარკვეული ეკონომიკური რყევების რისკი საქართველოსთვისაც გაიზარდა.

ქვეყანამ, რომლის ეკონომიკური პოტენციალის ერთ-ერთი მთავარი განმსაზღვრელი ტურიზმია, საჰაერო მიმოსვლა დროებით შეწყვიტა ჩინეთთან და ირანთან.

ეკონომისტების ნაწილი მიიჩნევს, რომ თუ სამეზობლოდან შემოსული ტურისტების რაოდენობა 15 პროცენტით შემცირდება, შესაძლოა ქვეყანამ ყოველთვიურად 80 მილიონი დოლარის ზარალი ნახოს.

ტურიზმიდან შემოსავლების მოსალოდნელი შემცირება ლარზე უარყოფითად აისახება. "კოვიდ19"-ის დაფიქსირების შემდეგ ეროვნული ვალუტის მდგომარეობის შეფასებისას ეკონომისტი ზვიად ხორგუაშვილი მიიჩნევს, რომ მთავარია ეროვნულმა ბანკმა სწორი მონეტარული პოლიტიკა შეინარჩუნოს. ეკონომიკის სფეროში მომუშავე ანალიტიკოსის თქმით, შესაძლოა რაღაც ეტაპზე ლარმა გაუფასურება დაიწყოს.