დაავადებათა კონტროლის ცენტრი ახალ მონაცემებს და კორონავირუსის ახალ შემთხვევებს აქვეყნებს.

როგორც ცენტრის ხელმძღვანელმა ამირან გამყრელიძემ განაცხადა, ბოლო ორი დღის განმავლობაში კორონავირუსის ახალი შემთვევა ქვეყანაში არ დადასტურებულა.

გამყრელიძის განცხადებით, დღეის მდგომარეობით, საკარანტინო ზონაში 150-მდე ადამიანი იმყოფება.

მისივე ინფორმაციით, დილიდან ლუგარის ცენტრში გაგზავნილ 23 პაციენტის ნიმუშს კორონავირუსი არ დაუდგინდა.

"თებერვლის დასაწყისიდან ჩვენთან დაფიქსირებული იყო 217 შესაძლო შემთხვევა, რომლებიც არიან დაკვირვების ფაზაში. აქედან, დღევანდელი რიცხვით ფიქსირდება მხოლოდ 3 დადებითი შემთხვევა, ანუ ბოლო 2 დღის განმავლობაში ახალი შემთხვევა ქვეყანაში აღარ დაფიქსირებულა. სამივე ავადმყოფი, რომლებიც მოთავსებული არიან ცენტრალური ინფექციური საავადმყოფოს ბოქსირებულ განყოფილებაში, თავს გრძნობენ კარგად. მხოლოდ ერთთან არის მცირედი სიმპტომები. ზოგადი კლინიკურ მდგომარეობა სამივე ავადმყოფის გახლავთ დამაკმაყოფილებელი.

კარანტინში დღევანდელი დღით დაკვირვების ქვეშ იმყოფება 150-მდე ადამიანი, როგორც მოგხსენებათ, ისინი განთავსებული არიან სხვადასხვა საკარანტინო სივრცეებში. ეს გახლავთ აბასთუმანი, საჩხერე, ტუბ-საავადმყოფოს ცენტრალური ბავშვთა განყოფილება, ვივამედი. ასევე იღებს საკარანტინოდ და შესაძლებელია გარკვეულად მონიტორინგი გორის სამხედრო ჰოსპიტალში და ცენტრალური რესპუბლიკური საავადმყოფო. საავადმყოფოებში შესაძლო ნიშნებით, კლინიკური სიმპტომებით გახლავთ ინფექცურ საავადმყოფოში 29 პაციენტი მოთავსებული, 5 სეფსის ცენტრში და 7 ქუთაისის ინფექციურ საავადმყოფოებში.

ასევე, დღეს დილიდან ლუგარის ცენტრში გამოსაკვლევად შესული იყო 23 ნიმუში და ყველა ეს ნიმუში გახლავთ უარყოფითი. ამჟამად, შესულია დამატებით 5 ნიმუში, რომელთა კვლელვა მიმდინარეობს," - განაცხადა ამირან გამყრელიძემ.