ირანელი დეპუტატი მუჰამედ დასტაკი ერთ-ერთია იმ ირანელებს შორის, რომელიც კორონავირუსმა იმსხვერპლა. მაღალჩინოსნის გარდაცვალების შესახებ ინფორმაცია რამდენიმე წუთის წინ გავრცელდა. დაღუპულთა ოფიციალური სტატისტიკა 35-მდე გაიზარდა. განსხვავებულ სტატისტიკას ავრცელებს "ბი-ბი-სი" წყაროზე დაყრდნობით.

მედიასაშუალების ინფორმაციით, თეირანი რეალურ მონაცემებს მალავს და ვირუსმა 210 ადამიანი იმსხვერპლა. ახალი ვირუსით დაინფიცირებულთა შორისაა ქვეყნის ვიცე-პრეზიდენტი, ჯანდაცვის მინისტრის მოადგილე და პარლამენტის წევრები. 10-დღიანი უშედეგო მკურნალობის მიუხედავად, ვირუსმა 23 წლის ირანელი ფეხბურთელი ქალი იმსხვერპლა.

ფატალური შემთხვევების რაოდენობით, ჩინეთის შემდეგ, ირანში ყველაზე მაღალი მაჩვენებელი დაფიქსირდა. საგანგაშო სტატისტიკის მიუხედავად, ქვეყანაში კარანტინი არ ცხადდება. თუმცა, ვირუსის პრევენციის მიზნით, ირანის პარლამენტმა მუშაობა შეაჩერა.