ამერიკული ფარმაცევტული კომპანია "გილეადი" კორონავირუსის სამკურნალოდ შექმნილი პრეპარატის კლინიკურ ცდებს კიდევ აფართოებს. "რემდესევირს" კორონავირუსის წინააღმდეგ საბრძოლველად, ჩინეთის გარდა, სხვა ქვეყნებშიც გამოიყენებენ.

"ნიუ-იორკ თაიმსის" ინფორმაციით, "რემდესივირის" ორი ახალი კლინიკური ცდა მარტში დაიწყება და აზიასა და სხვა რეგიონებში დაახლოებით 1000 პაციენტი მიიღებს მონაწილეობას.

"გილეადი" გავრცელებულ განცხადებაში არ აკონკრეტებს, რომელ ქვეყნებში შევა პრეპარატი.

"რემდესივირი" უკვე გამოსცადეს ჩინეთში, კონკრეტულად კი უხანში, რომელიც ეპიდემიის ცენტრია. აშშ-ს ჯანდაცვის ეროვნულ ინსტიტუტში განაცხადეს, რომ პრეპარატს გამოცდიან პაციენტებზე, რომლებიც კორონავირუსით სხვა ქვეყნებში დაავადდნენ და მკურნალობას, ამჟამად, ნებრასკაში გადიან.

უხანში ჩატარებული ცდების შედეგები აპრილში იქნება.

მსოფლიო ჯანდაცვის ორგანიზაციაში იმედი აქვთ, რომ "რემდესივირი" კორონავირუსთან საბრძოლველად ეფექტური იქნება.