თეა წულუკიანის პოლიტიკურ პასუხისმგებლობაზე საუბრობს 10 არასამთავრობო ორგანიზაცია. სამოქალაქო სექტორი შეშფოთებას გამოთქვამს ადამიანის უფლებათა კომიტეტის სხდომაზე, იუსტიციის მინისტრის მიერ სახალხო დამცველის პრევენციის ეროვნული მექანიზმის მონიტორინგის კადრების გასაჯაროებისა და ამ მექანიზმის ექსპერტის მიმართ არაკონსტრუქციული კრიტიკის გამო.

"ვფიქრობ სერიოზული ფაქტი იყო, როდესაც ყოველგვარი თანხმობის გარეშე გამოაქვეყნეს და გაამჟღავნეს სახალხო დამცველის ექსპერტის ვიდეო ჩანაწერი, შესაბამისად უნდა დადგეს მინისტრის პასუხისმგებლობის საკითხი. გარდა ამისა, აუცილებლად უნდა აღინიშნოს, რომ მე არ ვიცი, აქვს თუ არა ამ ხელისუფლებს რესურსი დარჩენილი, ამდენი წლის განმავლობაში, სასჯელაღსრულების სისტემაში არანაირი რეფორმა არ განხორციელებულა და პროგრესის ნაცვლად, რეგულაციებში გვაქვს რეგრესი,"- აცხადებს წამების მსხვერპლთა ფსიქოლოგიური რეაბილიტაციის ცენტრ "ემპათიას" დირექტორი მარიამ ჯიშკარიანი.

"ვფიქრობთ, რომ ასეთი მინისტრი არ უნდა იყოს ამ პოზიციაზე, რომელიც არღვევს საქართველოს კანონმდებლობას, საერთაშორისო კონვენციებით საქართველოს მიერ აღებულ ვალდებულებებს და ვფიქრობთ, მსგავსი კონფიდენციალური კადრების გავრცელება, როდესაც მინისტრის მიერ ხდება კადრების გასაჯაროება, შეუსაბამოა თანამდებობისთვის,"- "ინფორმაციის თავისუფლების განვითარების ინსტიტუტის (IDFI)” აღმასრულებელი დირექტორი, გიორგი კლდიაშვილი.