დეკანოზ გიორგი მამალაძის ძმა და ადვოკატი დღეს საკანში მის მონახულებას აპირებენ. ისინი შეეცდებიან მსჯავრდებულ დეკანოზს შიმშილობაზე უარი ათქმევინონ, რადგან მათი განმარტებით, მისი ჯანმრთელობის მდგომაროება უკიდურესად მძიმეა.

დეკანოზმა პროტესტის უკიდურეს ზომას მას შემდეგ მიმართა, რაც პრეზიდენტმა მის შეწყალებაზე უარი თქვა. გიორგი მამალაძესთან შეხვედრისას ადვოკატი აპირებს სტრასბურგის სასამართლოზეც ისაუბროს. დეკანოზის ოჯახი და მისი უფლებადამცველი ახალი ბრძოლის დაწყებას აანონსებენ და ამტკიცებენ, რომ მაღალი იერარქიის სასულიერო პირების მისამართით გაჟღერებულ ყველა ბრალდებას დაადასტურებენ.

"ჩემი შესვლის მოტივი და მიზანი არის, რომ გადავათქმევინო შიმშილობა, იმიტომ, რომ ეს გარკვეული პირების წისქვილზე წყლის დასხმა იქნება, იმ პირების, რომლებმაც ეს ყველაფერი მოაწყვეს და რომლებიც ჩაბუდებულები არიან საპატრიარქოში და დღევანდელ ხელისუფლებაში.

ექსპერტიზის დასკვნის საკითხსაც განვიხილავთ, რომ გავასაჩივროთ სტრასბურგში და დამატებით ჩვენ ხელისუფლებას პრობლემა შეექმნას, რომ ჩვენთან სასტიკი მოპყრობა მიმდინარეობს და უფლებები ირღვევა," - აცხადებს მიხეილ რამიშვილი.