დედაქალაქის საკრებულოს სხდომაზე დღეს თბილისის 2020 წლის ბიუჯეტს უნდა უყარონ კენჭი. ოპოზიცია 1,021 მილიარდიან ბიუჯეტს აკრიტიკებს და მის მხარდაჭერაზე უარს ამბობს. ხელისუფლების ოპონენტები ამტკიცებენ, რომ ქალაქის მთავარი ფინანსურ დოკუმენტში წინა წელთან შედარებით 79 მილიონით ნაკლებია და მასში შემცირებულია სოციალური და ინფრასტრუქტურული ხარჯები. უმრავლესობაში კი აცხადებენ, რომ ბიუჯეტი მთლიანად დედაქალაქის პრობლემებზეა ორიენტირებული და ოპოზიციას მოსახლეობის შეცდომაში შეყვანის მცდელობაში ადანაშაულებენ.

"ნაციონალური მოძრაობის" წევრი ლილე ლიპარტელიანი დედაქალაქის მერის, კახა კალაძის პიარზე გამოყოფილი თანხის რაოდენობაზე ამახვილებს ყურადღებას:

"ნარმანია 900 ათას ლარს კმარობდა პიარზე, 2020 წლისთვის კალაძის პიარი დაგვიჯდება 4,6 მილიონი. დედაქალაქში მძიმე განწყობაა, უმუშევრობა სიღარიბე, ჩვენ ვფიქრობთ, რომ ეს ბიუჯეტი არ არის მორგებული დედაქალაქის მაცხოვრებლების გამოწვევებზე და შესაბამისად ჩვენ მხარს არ დავუჭერთ,"- აცხადებს ლილე ლიპარტელიანი.

ბიუჯეტის მხარდაჭერას არ აპირებს არც "ევროპული საქართველო"

"აქ ისევ ხორციელდება ბიუროკრატიული ხარჯების გაზრდა, შესაბამისად აღნიშნული ბიუჯეტი ნაკლებად არის ორიენტირებული თბილისელების კეთილდღეობაზე და პრობლემების მოგვარებაზე, ჩვენ დღევანდელ სხდომასაც არ დავესწრებით, ვართ ბოიკოტის რეჟიმში," - აცხადებს "ევროპული საქართველოს" წევრი დავით ჟღენტი.

ოპოზიციისგან განსხვავებულად აფასებს 2020 წლის თბილისის ბიუჯეტს დედაქალაქის საკრებულოს თავმჯდომარე გიორგი ტყემალაძე. მისი თქმით ბიუჯეტი ძალიან კარგია და მასში ყველა პრიორიტეტია ასახული:

"ყველა ის პრიორიტეტი, რომელიც ქალაქ თბილისის მთავრობას აქვს დაანონსებული და რომელზეც მუშაობს ბოლო წლების განმავლობაში საკმაოდ მნიშვნელოვნადაა ასახული ბიუჯეტში, არის ძალიან კარი ბიუჯეტი და დარწმუნებული ვარ ბიუჯეტი იქნება მიღებული,"- განაცხადა გიორგი ტყემალაძემ.