ამ გემრიელი ჩაროზის რეცეპტი პროფესიულ კოლეჯ "იკაროსის" პედაგოგს,ქალბატონ თამარ ელისაშვილს ეკუთვნის. ფენოვანი ყვავილები მან თავის სტუდენტებთან ერთად სპეციალურად ჟურნალ `გემრიელისთვის" მოამზადა.ეს რეცეპტი იმ მხრივაც არის საინტერესო,რომ სწრაფად მზადდება და ამასთან ძალიან ეფექტურიცაა.

ინგრედიენტები
რძე - 3-4 ს.კ
კვერცხი - 1
შაქარი - 120 გ
ნუში - 125 გ
ფენოვანი ცომი - 1 შეკვრა
ლიმონის ცედრა - 1/2
რომი - 2 ს.კ
მომზადების წესები
ლიმონს გავაცალოთ ცედრა, ნუში დავფქვათ. შაქარი, კვერცხი, ლიმონის ცედრა, რომი, ნუში და რძე ერთმანეთში ავურიოთ (არ ავთქვიფოთ!), სანამ ერთგვაროვან მასას არ მივიღებთ.

ცომი გავაბრტყელოთ და მრგვალი ფორმით ამოვჭრათ.

თითოეული წრე ჩავაფინოთ ტარტალეტის ფორმებში, ოღონდ ხელით არ გავაბრტყელოთ.

ფორმებში მოთავსებული ცომი ჩანგლით დავჩხვლიტოთ.

თითოეულში მოვათავსოთ ნუშის გულსართი.

შევდგათ წინასწარ კარგად გახურებულ ღუმელში და ვაცხოთ, სანამ ზემოდან არ შეიბრაწება.